陸羽仁 BLOG 2015年2月23日
羊年展望
2015/02/23 09:22:58
網誌分類: 經濟
羊年到，首先祝大家羊年賺到咩咩聲，投資得利。但今年個市預料幾波動，呢隻羊係山羊唔係棉羊，所以大家唔好以為好易食，唔好太掉以輕心。香港股市愈來愈受內地股市影響，內地去年升咗咁多，今年都似會升，但走勢會相當反覆，所以港股會同樣反覆。
今年強勢的仍然是紅色股，將因內地持續放水而炒作，但基本因素可能無咁快改善。弱勢的繼續係國際銀行股，好似匯控咁，都可能係有反彈，難轉勢，除非換主席新人事有新政策出台。本地地產股去年升得多，今年可能要牛皮吓，再無大升的歌仔唱，因為細價樓咁升法，逼政府出招。地產股中可能只有長實因為炒重組而睇好啲。
上週五，希臘和歐元區財長達成協議，延長救助計畫四個月。美股應聲炒上，其中Global X FTSE Greece 20希臘上市交易基金跳升超過一成，在美國上市的希臘國家銀行暴漲近22%。
杜指及標普500指數收市齊創歷史最高紀錄，納指則連升第八日。杜指漲155點，收報18140點；標普500指數升13點至2110點；納指漲31點，收報4956點。上星期股開只有四個交易日，杜指上升0.7%，標普500指數漲0.6%，納指表現最好，升1.3%。
歐元集團主席迪塞爾布魯姆(Jeroen Dijsselbloem) 上週五表示，歐盟各國財政部長已達成共識，同意希臘救援項目延期4個月，但前提係希臘必需於今日提交改革計劃，分析界普遍認為希臘不難做到歐盟這個要求。有紐約交易員表示，估計歐盟官員唔會唔通過希臘遞交的計劃書，因為到目前為止，包括希臘及歐盟各國，似乎仍未其他應對希臘債務問題的好方法，既逼唔到希臘還債，又唔想希臘「脫歐」，惟有繼續玩「踢罐遊戲」（kick the can）啦，即係話唔想將個罐執番起，就唯有將個罐在路上踼來踼去，拖延一下。
希臘及歐元區財長會議結束後，迪塞爾布魯姆被問及如果希臘得不到新的援助，能否繼續存活下去。迪塞爾布魯姆沒有正面回答，但表示將會討論一個「可行的後續安排」（a possible followup arrangement）。不過，分析估計希臘能夠獲得新一輪的援助，將遙遙無期，因為除非希臘能夠證實可以落實協議內容，或者轉了新的政府，德國當不會再肯掏腰包。過去的經驗係，希臘接受援助時都同意在國內開徵比較苛刻的稅務，但卻未有一次做得到，希臘政府的信譽已經備受質疑。
無論如何，隨著希臘的債務可以再拖幾個月，市場對希臘問題的擔憂已經消退。投資者的注意力又將會轉移到美國的經濟資料，包括樓市、消費者信心、消費者價格指數和美國第四季國內生產總值(GDP)修正值，以及聯儲局加息的問題上。今個星期二及三，聯儲局主席耶倫將出國會半年一度的聽證會，為經濟和貨幣政策作證。新出爐嘅經濟資料以及耶倫的證詞，將成為市場推測聯儲局會否決定提早加息的判斷。
睇聯儲局上週三公開的1月份會議記錄內容，官員對於加息的語氣雖然仍然比較「鴿派」，繼續表示對幾時加息要保持「耐心」。Raymond James Financial首席投資策略師Jeffrey Saut估計，聯儲局近期可能仍沒有大的動作，耶倫會表示仍要睇睇經濟表現如何，至會作出決定。
而BMO私人銀行首席投資官Jack Ablin指出，整體而言，全球經正在好轉，其中歐洲及日本經濟正在改善中。歐元區去年第四季度GDP較第三個增長0.3%，較2013年同期增長0.9%。標準普爾全球首席經濟學家謝爾德（Paul Sheard）預計，在量化寬鬆推出後，歐元區經濟2015年可有約1%的增長。
至於美國經濟，上週五公報嘅Markit預覽版美國製造業2月份採購經理人指數(PMI)從1月份的53.9攀升至54.3，為11月以來的最高水準。美國經濟增長雖然緩慢，但基調仍然良好。很多市場觀察家仍然相信，聯儲局會於今個夏天決定開始加息，不過預期幅度唔會大。畢竟聯儲局極想將美國利率息推向正常化，但又唔想見到股市因為升息受挫。
陸羽仁
回應(5) 我想回應
陸羽仁 BLOG 舊文