異動空間：基建食正兩會熱
阿爺放完長假終於回魂，兩會概念股炒起，水泥、基建、內險、環保、醫藥股氣勢強盛，短線值博率不俗，但兩會結束之前要識落車。今年三大主題：國企改革、金融改革、一帶一路，下月應會公佈較具體措施，值得關注。A股暢旺方便企業抽水，對改革絕對有利，港股今年食粥食飯睇實中資股。
有戰友問，人行主管的《金融時報》都撰文，認為通縮風險已近，經濟都搞唔掂，股市點炒上去？首先股市係炒憧憬，家陣的確唔掂，但只要阿爺利用減息、降準的預期，營造一個經濟就快復蘇的憧憬，A股就有炒上理由。再講，中央交託咗個改革重任畀A股，不成功便成仁，點都要諗計拆掂佢。當然，A股上升期間會出現無數個震倉，能否堅實持有，就要考驗各位的毅力了。
一帶一路的政策核心思考就係要走出去，為其他國家提供基建服務，本月初成功進軍土耳其電力配送及零售業務的中國機械工程（1829），股價蓄勢挑戰新高，花旗報告認為收購能產生協同效應，每股盈利可望升最多5%，對日後多接海外定單有象徵意義，目標睇8.5元，不妨留意。
魏力
http://www.facebook.com/2012jason
魏力
異動空間 - 魏力 舊文