魚樂無窮：從超人的話發掘寶藏
■敏華現價息率達7.6厘，絕對係高息股嘅代表。圖為集團主席𤏸敏利。 資料圖片
長和系放榜，長實（001）業績主席報告最吸引眼球嘅一句，肯定係「全球低息環境可望持續一段較長時間」。超人估唔會咁快加息，同儲局揸fit人耶倫口脗沒有兩樣，錢周街都係，但投資難度同樣高，相對穩陣嘅高息股，今年繼續有運行！
食住個勢，今日推介傢俬股敏華控股（1999）。公司近幾年派息無間斷之餘，仲要越派越爽手，最新業績仲有特別息同紅股，現價息率達7.6厘，吸引度達十粒星，絕對係高息股嘅代表！有天時，點少得地利同人和。近排敏華隱現有兩個大炒理由，第一，公司突然宣佈回購五百萬股，涉資逾三千萬銀，相當於公司手頭現金1%，以回購嚟講唔係少數。點解咁大手筆？價值被低估是也！試想想，一隻美國復蘇概念股（北美生意佔逾半），大把現金（二十億）喺手做擴充，市盈率竟然只得十二倍，點計都唔啱數！第二，美國家居裝修用品零售一哥Home Depot上季同店銷售勝預期，股價已創新高，在港上市嘅生意夥伴創科（669）亦破頂，睇番敏華，同歷史高位7.32元仍有一段距離，同樣受惠美國樓市復蘇，追落後空間十足。
從圖表出發，公司於六至七元橫行好一段時間，屬靜極思動格局，以其回購價6.3至6.65元作入市參考，炒番上歷史高位，都有一成過外水位，屆時息率仲有近七厘囉！
唐牛
https://www.facebook.com/tongcow88
唐牛
魚樂無窮 - 唐牛 舊文