中環在線：郭基煇處男下海
今有份主持新地業績會
■不久將來，郭基煇便會坐中間，主持大局。 設計圖片及對白
新鴻基地產（016）今日將會召開中期業績會，以往由大股東郭炳江與郭炳聯兩兄弟率領一眾董事主持大局，但舊年底郭炳江被判入獄，情況自然有變。據聞，郭炳江位公子郭基煇（Adam）今日將會有份主持業績會，意味新地第三代正式走上台前嘞。
會跟老臣子學習
三十一歲嘅Adam持有美國史丹福大學管理科學及工程學士學位，仲有哈佛商學院工商管理碩士學位，早於二○○八年已經加入新地，喺新地唔同部門工作，但佢一直保持低調，直至爸爸郭炳江捲入貪汙案，佢開始做爸爸嘅替代董事，市場先至知道佢喺公司有一定角色。
及至舊年底，郭炳江被判入獄，Adam就正式升做新地執行董事，而喺嗰段時間佢要面對傳媒追訪，佢亦做好準備，大方講感受，市場先至加深對佢嘅印象。
聽講，以往Adam都有參與新地嘅業績會，不過佢多數混入記者群中，揀個冇乜人留意到嘅位置靜靜觀察。因為以前好少人見過佢廬山真面目，所以都真係冇人留意到佢嘅存在。
雖然Adam今日有份坐上台，不過中國人最講輩份排位，Adam似乎未夠斤両坐佢爸爸以前坐開嘅中間位置。聞說，今日將會由佢阿叔郭炳聯坐中間主持大局，Adam就會跟佢兩位「太傅」、即係老臣子兼執董黃植榮、董子豪坐喺旁邊。
郭炳江被判刑後，曾經向新地全體員工發信，點名指黃植榮、董子豪將會同郭基煇分擔佢嘅職責，全力協助郭炳聯，所以就有呢個三位一體嘅安排。Adam應該都唔會齋坐嘅，佢已經接受應付傳媒提問嘅特訓，準備好今日學嘢兼露兩手。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文