一周三件：合豐賣殼遐想
■許森國任主席的合豐集團，有賣殼的潛質。 資料圖片
合豐集團（2320）成間公司市值僅得3.6億元，在股東當中，仲包括印刷線路板大孖沙建滔（148）。而呢期賣殼或者憧憬變身嘅細市值股仔，炒到甩轆，合豐有遐想。
鱷魚恤（122）喺十日前公佈控股權或者易手，喺二月十六日（周一）時高開，跟住四個交易日，一支箭咁翻咗一番。遠東控股（036）公佈賣主要物業畀大股東，市場憧憬遠控變現有新搞作，最近四個交易日最高升咗四成半。
主業食正網購潮
合豐又點？成間公司市值亦僅得3.6億元，大股東許森國家族，揸咗53.6%，第二大股東建滔，揸14.16%，街貨得32.2%，或2.34億股，等值1.17億元咁大把，有俾獨立人士傾賣殼嘅潛質。而後邊建滔，近年發展內房，有聲有色，坐擁過六千萬平方呎嘅土儲，亦有透過分拆上市釋放價值嘅潛質。
排除曬變身或者俾人斟嘅可能性，合豐啱啱喺上年尾，公佈以4.8億元，出售鳳崗合豐紙品廠，估計出售收益4.3億元，已經超過合豐市值，若果喺嚟緊二○一四年成績單入賬反映，業績靚爆鏡。
又合豐家陣主打瓦楞紙產品，場內估計，喺網購大熱下，上年，祖國包裹數量，達到一百一十億件！合豐主打瓣數，食正網購潮，分到半杯羮，都肥仔。又未計賣廠增值反映，合豐現價（0.50元）PB，都係得0.3倍。
而啱啱喺上月尾，美國包裝企業Rock-Tenn同MeadWestvaco，進行換股合併，組建成過千億港元嘅包裝王國，兩隻股由上年十月到家陣，升咗四成過外，其中一個原因，亦係憧憬受惠網購熱，紙品好賣，家陣PB兩倍樓上。買合豐，當翻一番到0.98元計，PB都係得0.6倍，街貨市值兩億銀咁大把。
錢雋
細價股專家
本欄逢周二、三、五刊出
錢雋
一周三件 - 錢雋 舊文