中環在線：小超人難得開心笑
重組過關一刻 被放上YouTube
■條片加曬標題，你都咪話唔係精心設計。 資料來源：YouTube圖片 
所謂有圖有真相，拍埋片有聲有畫面就更加好喇。上星期三長實（001）舉行股東特別大會，要求股東投票通過重組方案，唔知邊位仁兄咁有心，最重要係避得開副主席「小超人」李澤鉅嘅保鑣，可以近距離拍到小超人睇投票結果嘅開心樣，仲要將條片放上YouTube，實行同大家開心share喎。
有老花 要拎開副眼鏡
秘書楊逸芝拎住張點票結果紙畀小超人睇，五十歲嘅小超人有老花，近距離睇張紙嘅時候，要拎開副眼鏡先睇得清楚，佢知道有99.75%股東贊成長實遷冊同改名為長和之後，即刻笑曬話「幾好，幾好」。
喺呢個時候，楊逸芝就表情十足、拍曬心口咁話巧驚驚，話成朝驚呢個議案過唔到，小超人即刻安慰佢話使乜驚，仲前後講咗兩次今次係「幫股東搵錢」。
睇呢條片，最難得係見到小超人嘅燦爛笑容，需知道佢一向俾人感覺寸寸哋，平日答記者問題，有理冇理都一句「得」埋去先。上周四長實、和黃（013）舉行業績會，都有人問超人有冇覺得李澤鉅平日冇乜笑容，超人諗一諗就幫乖仔辯護，指「各人有各人表情，或者佢有開心事都會笑嘅」。
咁好明顯，小超人見到咁多股東贊成重組第一步嘅議案，咪笑得咁燦爛囉。
不過話時話，長實上周三嘅議案只係投票遷冊同改名，持股四成嘅超人作為大股東都可以投票，有佢贊成，議案通過嘅機會好大，除非有一成小股東攪局反對㗎啫。嚟緊將會到和黃召開股東會要求股東就重組方案投票，小超人喺條片入面係咁話「幫股東搵錢」，唔知幫唔幫到拉票呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文