異動空間：發掘辣招受惠股
樓市又加辣，七百萬元以下樓只能做六成按揭，連埋按保才可做八成，以上車價四球一間計，按揭做到盡連埋使費、按揭保險及少少裝修費，無一百萬幾乎不可能上車。陳總話措施為遏止細價樓升幅，但眾所周知市場缺盤令樓價狂升，推高按揭成數難令置業需求消失，只會令銀碼較細的劏盤更搶手，本來夠錢買三百呎，家陣二百呎都要買住先，你話辣招對市民是福是禍？
上周五三點幾，金局管甫出記招通告，地產股就開始隊，但今次加辣只會短暫影響氣氛，好快就會知道係流料，對賣樓影響有限。何況地產商一早睇通政府招數，將樓盤越劏越細迎合市場需求，今次辣招將令有關樓盤更暢銷，地產股本周隨時反高潮炒上。另一方面，買家在銀行做唔足按揭，更多將轉搵財仔幫手，財仔股如環球信貸（1669）、靄華押業（1319）等，本周又可以吼實。
另正進行招股的華夏動漫（1566）不妨留意。公司業務模式有點像迪士尼，先創作動漫角色，再開發周邊產品、拍電影、開主題樂園，甚至以虛擬偶像開演唱會！如招股反應熱烈可順勢跟進。
魏力
http://www.facebook.com/2012jason
魏力
異動空間 - 魏力 舊文