異動空間：利標喪炒催化劑
利標品牌（787）去年7月掛牌後喪跌一半，原因眾說紛紜：一、中期業績見紅，基金見唔對辦掟貨；二、利標由利豐（494）分拆，每揸一股利豐獲派一股利標，利豐股東不少為恒指追蹤基金，無啦啦多咗批利標，唯有焗掟出街。上周派全年成績表，一地眼鏡碎，下半年條數勁靚仔，核心淨利潤按年急升37%，毛利率升、經營現金流大增，現價PE僅13倍，突然變得相當抵買！CEO去年8月講過全年會有錢賺，今年盈利會更好，已兌現一半，另一半要達標應無問題。走寶的基金料會大舉掃貨，加上沽空盤平倉走鬼，按鐘擺理論，之前隊得越狠，當市場觀點逆轉，升勢將會又急又勁，料好快挾番去1.7元水平。
今年睇好利標三原因：一、家陣全球經濟邊度最強？美國。利標當地業務佔80%收入，食正經濟復蘇；二、與碧咸組合營做品牌相當明智，配合已有的迪士尼、CK、Michael Kors得知名品牌，CEO預期五年內可發展成10億美元收入的公司；三、大陸基金投資港股通股份撤限，A股並無類似利標的股份，絕對是股價爆升的催化劑。
魏力
http://www.facebook.com/2012jason
魏力
異動空間 - 魏力 舊文