魚樂無窮：殘爆熔盛蓄勢大反撲
■熔盛噚日成交股數5.6億股，乃繼2010年11月掛牌以來最高。 資料圖片
提起熔盛（1101），大家只會諗到一堆負面消息──一年狂蝕98億，金額仲高過市值，恐怖；每股NAV0.45仙，市賬率216倍，天價；大股東張志熔是非多多，混亂！俗啲講句，真係衰到
貼地。不過，喺零期望嘅情況，只要有丁點好消息，哪怕是十劃未有一撇，都足以令股價由地底彈番上地面。
熔盛周二發通告，公佈一連串消息︰早前洽售造船及海洋工程業務核心資產與負債，潛在買家原來係一間A股公司，公司透露磋商進展良好，兼且同多家主要債權銀行簽署同意函；公司同時宣佈，明日（周五）起將易名為華榮能源。
從任何角度出發，上述消息皆百利而無一害。第一，泊到A股碼頭，搖身一變成為港A股，知名度大大提升，肯定惹來北水注意，再講，出售資產未有提及條款，隨時涉及印股票，意味可升呢為A股公司在港上市旗艦，升價十倍；第二，搖身一變成為石油及天然氣股，睇番場內三桶油，市值全部過千億，難得有一個唔夠100億嘅新面孔出現，炒爆是常識吧。
再望一望成交，不得了，噚日成交股數5.6億股，乃繼2010年11月掛牌以來最高，各路人馬大手狂掃一隻只炒憧憬股份，相信冇一倍唔會收手，用噚日開市價0.85元做計數位入場，換取一個海闊天空新世界，點秤都值博。
唐牛
https://www.facebook.com/tongcow88
唐牛
魚樂無窮 - 唐牛 舊文