智取大市：港股大調整忌死坐貨
大時代股票必勝法裏面講到，股市原意，乃讓集資投資有其地，社會向榮，人皆有賺。惜人性貪婪，耗盡心思，巧取豪奪，樂土成煉獄……
正正因為有人要耗盡心思，巧取豪奪，就令到股市成為總有一批弱者一定要輸嘅遊戲。股市之能夠要上升，就係要搵出弱者所在，然後向弱者提款，
再存款入去強者手中。
一般嘅成熟市場，例如港股，散戶必然係輸家。由於港股散戶入場猶如進入屠場，所以相反理論永遠管用。
不過，內地A股就好唔同，弱者係納稅人、地方政府同埋銀行，贏家就係官員同埋官場周邊勢力人士，A股散戶絕對唔係大戶嘅主要獵物。A股近一年喪炒，市值大咗，上市公司跟手就可以向銀行喪借貸款，他朝還唔到錢，就由銀行硬食壞賬，之所以內銀股永遠都係價值陷阱。A股上升，部份原因係財政政策驅使，某啲政府項目外判工程，接工程嘅企業就開天索價，中間利潤就流入官員手中，結果硬食嘅就係地方政府，亦即係納稅人，變成股市上升嘅輸家。
由於A股散戶並非目標獵物，故A股升就能夠與眾同樂，呢一年經常有報道講散戶贏咗幾多倍，十萬元變百萬元，但喺港股市場，你想搵個散戶贏夠1倍都唔易。
未來兩周高危期
A股散戶贏完可以再贏，相反理論就不管用。睇A股幾時見頂，最靠得住已經係睇圖表，晉佳相信A股未見終極頂部，但大調整日子不遠矣。
滬綜指由4500點開始，升勢越嚟越chok，9日RSI現六頂背馳亦夠曬誇張，正路劇本之下，A股有機會出現近一年升浪以嚟最大調整，相信好大機會跌至chok市起點，即4500點樓下，如果恐慌起上嚟，分分鐘可跌到低過4000點。
港股向來比A股弱勢，若滬綜指要下試4000點的話，恒指好難唔大跌，指數喺25000至27000點之間欠缺承接力，下試25000點都唔過份，各位要有心理準備，呢嚇調整絕對唔易捱。散戶4月掃咗貨，決定死捱到底嘅話，呢一浪可能會重傷。
以形態計，恒指跌破小雙頂頸線，上星期五後抽都出現埋，噚日跌市先至係調整浪開端，加上之前一個下跌裂口都未出現過，喺25000至27000點之間欠缺承接力之下，有機會現連續裂口下跌，未來兩星期係高危時期，跌完呢浸先再部署撈貨。
P.S.根據小弟嘅經驗，無論教人投資、抑或係自己投資，原創係非常重要。因此晉佳向來甚少引用別人嘅文章，今次引用大約50字嘅大時代股票必勝法，已經係極限。
晉佳投資資歷尚淺，但見過每一位炒股發達嘅人，都能夠獨當一面，開發一套適合自己嘅方法去賺錢；而未嘗見過一位單靠別人冧巴、唔懂得獨立投資分析嘅人，能夠成為長勝將軍。要喺股海中大獲全勝，齋照抄會行得通？
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文