女神tea time：僑雄逆市企得穩
■早前楊冪帶頭網上曬露腰照。 資料圖片
楊冪帶頭網上曬露腰照，話反手摸到肚臍就代表身材好，就算明知唔合邏輯都玩咗先，聽落好儍，但呢個就係市場。明知漢能（566）唔值咁多錢，升到癲價時個個都堅持話佢會升，就抱住唔炒會執輸嘅心態，衝入
去，結果夾硬來，咪就係一齊甩臼囉。
僑雄國際（381）近來成交增加，自上周四突破0.365元阻力位後，股價第2日雖係陰燭，但出現長下影線，反映買盤強勁，去到噚日大市跌超過400點，僑雄股價仲可以升到4%收0.355元，隻股明顯於現水平整固。
首先間公司曾經試過有賣殼之意，一次係2010年3月，斥資14.39億元收購內蒙古煤礦，賣家完成交易後，可佔股權40%以上。直至同年8月以最多88.89億元收購內地8個煤礦，交易完成後，呢單刁賣家，應佔僑雄股權71%以上。雖然最終兩單刁都拉倒，但短短半年內，收購項目金額跳升，反映公司力求大變，有心食大茶飯。僑雄上年9月委任曾喺高盛等多間大行做過，於亞洲股票資本市場、企業融資及併購方面擁有經驗嘅龍田淵做執董。至本月初，僑雄公佈配售1.619億元可換股債券，最多可兌換5.7億新股，佔經擴大已發行股本16.67%，初步換股價0.2835元。配售之後，股價即時起動，估計往後可能有所動作。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文