情陷夜中環：馬老闆
■馬武輸過錢、死過老婆後，仍能立刻站起來。 《飲食男女》圖片
買《忽然一周》，幾乎是星期六的指定動作。重點不在於每周的娛樂標題，而是內裏那本《飲食男女》。如果《飲食男女》可以單買，我肯定會單買，因為我覺得這是一本極高水準的雜誌。對，不只好看，是極高水準。《忽然
一周》竟然夾著一本極高水準雜誌，你未睇過，唔會信。
主要講食，但走的路線跟《明周》副刊有點相似。那當然，《飲食男女》的選材和文字好睇一千萬倍，睇完，你會儲起佢。講到香港的食潮，就算你跟得幾貼，都唔會夠記者咁貼。一本《飲食男女》嘅料，夠你食一個月。
創業冇錢賺 妻子自殺
但重點是，內裏的文章和專訪，跟其所介紹的美食一樣，非常「好吃」。慢慢咀嚼，可以大快朵頤。有些文字，更有米芝蓮水準，不但好吃，更要找機會回味。第1038期的六十八至七十三頁，是米芝蓮三星級傑作。
那六頁紙推薦的食店叫做「馬記小食」，位於觀塘，專訪的標題很玄：苦行。撰文的記者叫周燕，點題一段，她這樣寫：「其實肉身凡人，早在呱呱墮地一刻，已跌入塵網。反求諸己，何不回溯自身苦路，自我觀照？」看完這一段，我立刻看看雜誌封面，make sure自己真係睇緊《飲食男女》，唔係《讀者文摘》。
「小小一家店，招牌掛上又拆，拆了又掛，老闆自身，也久經劫難，嘗盡人間五味架。」唔識點講，總之寫得好妙。妙就妙在，heavy得嚟好light，light得嚟又好有養份，看下去之前，要深呼吸。
馬記小食的老闆叫馬武，二十多歲偷渡來港，做過地盤。一口鄉音，受盡歧視，同一份工，人哋hea做都有糧出，佢要做唔停。「但馬武並不自卑自損，反而儲備了一腔志氣。」呢句寫得好正，受人白眼，反而鬥志更盛。做人一定要有鬥志，所謂鬥志，好簡單，就是自己的人生，要自己揸莊。
香港金融界猛人莊友堅說過：「一個莊可以去沽，亦可以去買，一個莊有佢嘅思想。」有自己思想，聽落好簡單，但要實行自己所想，則是another story。
1983年，馬武為自己揸莊，創辦馬記小食，但冇人話揸莊就贏梗。唔識做，於是冇錢賺，冇錢賺，於是冇糧出，馬武人生其中一頁就是這樣的，多少過氣老闆的人生也曾經是這樣的。冇糧出，所有點心師傅走曬，開唔到舖，馬武跪喺度喊。「還不夠絕望，尚可更絕望，留給我日後用來形容前面境況」，1988年，馬武當時的妻子在觀塘碼頭跳海自殺，留下馬武和一歲大的兒子相依為命。
懂得振作 更值得同情
畀著你係馬武，會點？問嚟都多餘，選擇只有一個，就是立刻站起來，繼續面對。有啲人，唔好話死老婆，就算係死咗隻狗，都要一年半載先可以「重新投入工作」。唔係話死咗隻狗係no big deal，絕對big deal啦，死狗喎，但係死乜都好，冇人係奉旨同情你，但係你絕對奉旨為在生的人負責，包括同事、朋友、家人。
呢個世界好得意，你越堅強，人哋越係會同情你。另一部門有位女同事，佢未婚夫cancer過身，半日後已經返工，返工後兩個鐘頭紅住對眼但係笑住口同你講個presentation已經搞掂。
懂得振作的人，somehow，比只懂意志消沉的人更值得同情。如果你有同事純粹因為失戀之類的問題而降低了工作效率，你應該同佢講，不如你轉行去娛樂圈做演員。世界上只有演員適合帶著情緒工作，失戀個mood最啱拍悲劇。
講番馬武，接二連三被打擊後，他怎樣？事業上，「他嘗過外行人管內行人的難處，於是決意學起做點心來，造就了今天的手藝。」感情上，妻子過身幾年，他遇上第二任妻子，她沒有介懷馬武的過去，把他的兒子當作是自己的一樣疼錫。第二任妻子為馬武誕下兩名女兒，所以他現在有三個孩子，分別是27歲、21歲及18歲，他們是「馬武每天辛勤工作的最大動力」。
星期六的下午，我開車到觀塘，約女同事一起去幫襯馬武。我和她根據《飲食男女》的介紹，點了三文魚、豆腐、南瓜。
「駿業街67號熟食市場1樓35號」這個地址，你們要抄下來。當你或你的朋友遇上人生前所未有的挫折，記住去馬記小食，嚐一嚐馬武的手勢，然後一邊吃，一邊看著這個中過風、輸過很多錢、甚至乎死過老婆的馬老闆。
見馬老闆馬武現在活得依然這麼有型，你就會明白到這個道理：過去的就讓它過去，千萬不要跟自己過不去。
葉朗程
葉朗程
情陷夜中環 - 葉朗程 舊文