笑到最後：網癮起 買聯通
A股跌到喊，冷靜一諗，牛市下半場要開波，一定要有唔少人覺得牛市已完，萬念俱灰，沽得七七八八，先可以引番啲人入場。本欄繼續相信，牛市未完，抽水大業仍未完成，但幾時再開車就唔知，可能仲要震一段時間。
人人話個市唔會長升，因中央唔想啲股民一面倒睇好，造成狂牛；倒轉
諗，個市亦都無可能一支箭下跌，否則沽空嗰啲咪好易發？咁多人掟貨去造就沽空一方賺錢亦唔合理。而個市就好似睇踢波咁，你覺得自己捧嗰邊好難入波，但對方球迷都覺得自己嘅門前驚險。
5至6月連續跌市，不排除7月會有啲反彈，要追，第一個條件係藍籌股，第二就要揀最落後嘅股，高明相信，回落到4月大時代前水平嘅股有得博，兩個條件底下揀中資電訊股，三大理由首選聯通（762）。
一、網癮洪流不可逆轉。網上極多文章批評中國人唔睇書，個個掛住睇手機，現實世界，強國人可能係最愛做低頭族，上網成癮，數據成為生命鴉片，電訊商同清末賣鴉片無乜分別。
二、電訊股回落至港股大時代前水平。自4月高低位計，中移動（941）最多跌17.16%、聯通跌25.5%、中電信（728）跌26.09%。大摩報告話，環球大戶最睇淡電訊股。一旦反彈，最underweight嘅股報復式反彈最勁。
內地通訊網速最快
三、唯快不破。網癮已成大病徵，係完全失去耐性，一步步追求更快嘅網絡。麥格理報告指，室內4G聯通速度快過中移動96%；室外4G中移動聯通速度相近；深圳地鐵中移動覆蓋最好，50%深圳地鐵都用到。結論係聯通係三間通訊商中最快，速度贏到開巷；中移動贏覆蓋，但係僅勝。因為速度快，所以揀佢。
近期聯通股價12蚊水平見底，之後一嘢抽升至12.76蚊，上周五再跌一次，回到接近12蚊水平，估計約12蚊已經見底，再次提供入市機會，初步目標先睇聯通重上16蚊，博33%回報。
最後，上個禮拜先話唔買中資股，今個禮拜又買聯通，轉軚呀？高明會答：上個禮拜高明就好似建制派咁懵嚇懵嚇離咗場，但出咗去聽到鐘聲，梗係衝返入場啦，總好過第二日酸溜溜咁話留低嘅人「跳船」咁樣衰吖！擺明轉軚呀！惟有靠聯通一升以謝天下。
高明
即上偶像派財演專頁：
https://www.facebook.com/bigricetea
本欄逢周一刊出
高明
笑到最後 - 高明 舊文