一周三件 - 錢雋 2015年6月29日
一周三件：中信值得煲重
■常振明任主席的中信股份，改組後估值低，值博率高。 資料圖片
有輪商報道話，部份個股窩輪，出現俾街客收到歸曬邊嘅情況，係近年少有，當中一隻對應正股，就係中信股份（267）。唔講乜concept，中信食正金融熱爆潮，預測PE跌到得5倍，比恒指綜合平均平咗半，已經有值得煲重理由！
估值超平追落後
中信上年改組兼獲阿媽注入勁厚金融資產，喺5.9萬億元總資產當中，呢瓣係佔咗過八成比重，達到5萬億元。而喺金融海嘯期打後，大出血嘅資源能源瓣數，縮到只係佔重組後總資產嘅2.5%，影響係微乎其微。諗到係，食住阿爺力谷金融，製造財富效應，嚟緊日子，中信金融瓣數，照計係最賺到錢，兼掂過碌蔗！場內專業評估，亦係咁估，中信今、明、後三年EPS係2.15元、2.3元同2.54元，增長34%、7%同10.5%，PE由8.8倍，跌到得2015年6.5倍、2016年6倍同2017年時5.5倍。
仲吸引係，憑住大比例金融瓣數，場內預估中信NAV，由去年底17蚊，升到去2017年時近24蚊，增幅達到41%，2017年預估PB，得番0.5倍！場內無論銀行、證券或者保險瓣數，都無好似中信咁平嘅PB！又中信現價（14蚊）喺2008年金融海嘯期後、近六年橫行底，比起上年阿媽注資時，引資社保基金、國壽（2628），同今年引入泰國首富謝國民、日本五大商社之一嘅伊藤忠等等大孖沙嘅每股成本價13.48到13.80元，高出幾個巴仙咁大把，大孖沙點會志在區區幾個巴仙回報？
恒指由今年到後年PE預測係11.1、11.6同10.7倍，三年PB預測係1.38、1.3同1.2倍，中信PE平咗半，PB更加平60%！買中信單係追恒指10.7倍PE水位，係講緊要升95%，到27.3元，追恒指1.2倍PB，係要升106%，到近29蚊。
錢雋
細價股專家
本欄逢周一、三、五刊出
錢雋
一周三件 - 錢雋 舊文