陸羽仁 BLOG 2015年6月29日
希臘危局
2015/06/29 09:22:00
網誌分類: 經濟
今日將有兩大因素左右大市，一個係阿爺出減息和定向降準兩招救市，另一個係希臘可能債務違約。
先講希臘，上周五，歐元區財長會議唔接受希臘所提的展延方案，仲發出聲明譴責「希臘片面破壞債務協商的對話基礎」。希臘債務談判又陷入危機。
不過歐洲股市未為所動，整體靠穩，德國及法國股市仲有輕微進賬，反映投資者仲未係咁悲觀。
但要留意的是，希臘總理、希臘長毛齊普拉斯唔再和債權人開會返國，馬上招開內閣緊急會議，並促使國會在上周六淩晨以179票支持票通過一項決議，將於7月5日就是否接受國際債權人的還款提案舉辦全國公投，政府話明不建議人民接受國際債權人的建議。
雙方的爭拗焦點在於恢復財政平衡的方法，希臘的方案側重於加稅；債權人反建議要求加大削減財政開支；當中，希臘原本提出到2025年把退休年齡逐步提高至67歲的期限；債權人則要求在2022年達標。
雙方講不掂數，希臘拖欠國基會的貸款將於周二到期，希臘違約危機升溫，民眾擔憂政府現金流量不足，各個提款機前大排長龍。齊普拉斯在召開緊急會議後，宣布股市周一休市一天、銀行也將暫關閉，並會採取資本管制措施。齊普拉斯在演說中呼籲希臘民眾冷靜，又指希臘政府會確保他們的存款安全無虞。
市場分析齊普拉斯叫公投有兩個可能，第一係預咗脫歐，唔想自己孭重政治責任，就交波俾人民，大家一起來承擔脫鈎的後果。第二個可能係「曬冷」，希望藉公投反對債權人方案的結果，博一舖增強希臘的談判的最後籌碼，話自己係民選政府不能做違反民意的事情。
希臘債務危機呢隻「冤鬼」又回魂，雖然唔會好猛，但唔多唔少會拖歐美股市後腿，今早杜指期貨跌245點，跌幅約1.2%，日股就跌2.3%。
另外睇睇大陸。內地股市之所以大跌，上證綜指由6月8日最高的5178點，跌到上周五?4193點，唔見咗985點，跌幅超過19%！認真慘烈。我之前提過，中國經濟一日唔得，阿爺都只夠放水，唔敢收水，所以牛市未會玩完，不過，阿爺見到股市炒得咁癲，怕佢太快爆煲，閂閂水喉，控制一下場外孖展，想佢跌番幾百點，但佢一跌大過籠，唯有又出手放水頂住個市。
阿爺今次唔單止降準，仲同時減息，雙管齊下。央行上周六宣布，由28日起一年期存貸款基準利率下調0.25個百分點；另外，定向降準，對貸款俾農民和中小企的合資格?城市商業銀行、非縣域農村商業銀行降低存款準備金率0.5個百分點，財務公司存款準備金率降3個百分點。市場估計，會有超過七成的商業銀行符合要求，今次降準將釋放4700億流動性。本來定向降準並無限制降準功效細啲，但加埋減息兩招齊出，力度都相當大。阿爺怕場外融資殺得太厲害，又怕希臘局面令外圍不穩，唔想爆災，唯有落重藥。
民生證券研究院執行院長管清友表示，從降準降息時點的選擇來看，中央已經在有意識地進行危機應對，以避免場外融資大規模強制平倉引發系統性的金融風險，幫助市場信心的恢復。佢認為牛市方向沒有變，不過，去杠桿引發的市場恐慌情緒已經形成，令到降準降息的刺激作用有限，牛市的節奏會放緩。
內地券商亦認為，利好政策有助情緒修復，未來更趨理性，估計瘋牛難見。中期睇好互聯網+、智能制造，國企改革概念股、軍工股等。銀行的利差有望穩定，利好銀行股。
若然內地真係瘋牛變慢牛，長玩長有，又未嘗不是一件好事。
陸羽仁
回應(20) 我想回應
陸羽仁 BLOG 舊文