中環在線：
「二叔公」搞App 上門收典當
■陳啟豪指客人當名牌手錶佔四成。 朱永倫攝
大媽大叔有事要周轉，會去財仔借錢，或者叫親戚幫手，甚至拎隻金撈搵隔籬屋「二叔公」（當舖）套現。不過𠵱家乜都數碼化，傳統嘅押業都要轉型，靄華（1319）諗住飛甩老土，整個App做上門典當，啲客可以
「印印腳」喺屋企等，但咁多貴重嘢，CEO陳啟豪（Edward）要唔要建立鑣隊呢？
Edward受訪時話，佢𠵱家改善緊App個估價服務，遲啲公司仲研究緊可以派人上門收取，擴大個客戶層面，咁搞法實體當舖隨時消失都似，同埋唔知客人肯唔肯俾人上門呢？
■傳統押業靄華諗住飛甩老土，整個App做上門典當。 設計圖片 靄華同押送公司傾緊
呢個模式都有啲問題要解決，就係要確保物件運送過程順利，「唔見咗可以用保險賠，但刮花咗隻錶就好多爭拗」，佢話之前諗過全程用video錄低，唔使咁多誤會，但就唔會自己建立鑣隊收貨，𠵱家就同押送公司傾緊。個個拎住支槍唔驚俾人劫鑣。
講返近排啲客當乜嘢多，Edward話黃金、鑽石、首飾長期佔五成，名牌手錶就佔四成，大家以為好多人會當嘅電子產品，只係得2%。不過近排有個闊太連續當咗3個名牌手袋，牌子名H字頭（仲係有code嘅，明啦），原來平時呢啲包包少啲人典當，因為易track到個身份喎。
靄華之前諗住衝出香港去緬甸，但就唔係做押業，而係做私人貸款或者係信用卡貸款咁，點知發覺香港都賺到呢筆錢，所以無乜點再諗呢方面嘅事情，都係做返個香港二叔公。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文