智取大市：千隻高銀一齊爆煲
經歷一輪恐慌性的拋售之後，負面消息逐漸浮上水面，呢一刻趁大市反彈，就要睇清楚局勢，由頭到尾將大市重新分析一次。
中港股早一輪跌浪係因為A股去槓桿所致，配資、兩融嘅去槓桿完成之後，究竟意味住最壞情況已過？定係跌浪只去到中途，仲有更可怕嘅事發生？
晉佳偏向後者
，因為客觀事實令人覺得事態非常嚴重。
上個星期有超過1,400隻A股爭住停賽，但今個星期一見A股回穩，就有超過300隻爭住噚日復牌，等都等唔切，唔講都知，大戶等錢使。
A股中小股估值超高，識炒股嘅人一定知，上述超過1,400隻股份，唔少市值成幾百億元人民幣，市盈率閒閒地50倍、甚至100倍。換言之，分分鐘有成千隻高銀地產（283）、高銀金融（530）同一時間跳樓。
既然內地容許配資一開三、一開四、甚至一開十，擁有強勁後台嘅大戶，睇怕閒閒哋拎到至少一開三嘅融資出嚟炒股。一隻漢能（566）已經話畀大家聽，幾百億、幾千億元市值中小股是如何煉成，押股、炒上、再押股、再炒上，接受押股嘅，正正係中資金融機構，只要中小股股價急跌，就可能唔少大戶資金鏈斷裂。大家望一望噚日A股反彈，內銀、券商A股逆市下跌，就知大家開始驚券商、內銀要為可能出現嘅中小股爆煲埋單。
點解超過300隻A股復牌，噚日A股都仲可以有得升？原因係大股東、管理層唔准沽貨，又唔准沽空，冇大戶沽，自然冇得跌。不過，大股東應該好快諗到jail break的方法，jail break沽貨相信遲早會發生。
即使冇人沽得貨，亦將會令到A股嘅套現功能完全停頓，風頭火勢之下，相信銀行亦唔敢重開股票融資，以免日後死多幾錢重，從而令股票抵押融資、發新股集資嘅功能同時冰封，水源被閘，A股一樣遲早跌，所以畀沽又死，唔畀沽又死，而家只係拖延時間。
資金鏈問題遲早又出現，但要搞咁多嘢，莫非真係要畀高官沽咗貨先？
月初就有一單新聞非常值得留意，就係海通證券（6837）公佈不超過216億元人民幣股份回購計劃。
更大型斬倉潮醞釀中
從傳統券商業務模式嚟睇，資金係券商最重要嘅資產，係唯一進攻嘅武器。而家海通證券選擇用錢回購而非擴充，即係放棄未來搶市佔率、爭取盈利嘅機會，等同自我漽滅未來市場價值。
如此大犧牲，都要回購護盤，等如話你聽，海通可能會面臨生死存亡，內地券商以至大市都危危乎。
今次呢單嘢，睇嚟絕非之前斬配資、兩融咁簡單，可能係醞釀更大型嘅斬倉潮第二波，冇估錯的話，港股好快又要做提款機。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文