中環在線：渣打高層洗牌
洪丕正又升職
■洪丕正升職之後，會直接向渣打新任總裁滙報，認真威水。 資料圖片
渣打集團（2888）管理層又大地震，噚日宣佈全球8大地區縮至4個，聞說最少有兩名管理層被炒魷，不過喺呢個優勝劣敗嘅戰場上，大中華區行政總裁（CEO）洪丕正（Ben）仲有得升，佢今
次又跳多層睇埋北亞地區，兩年唔夠升兩級，恭喜曬。
直接向集團CEO滙報
Ben原本喺美加做banker，到咗1992年，佢忽然覺得自己要好似一條三文魚咁力爭上遊，就返咗香港加入渣打銀行，由低做起。2006年升任個人銀行主管，2008年變咗香港區CEO，2014年睇埋大中華區，今年再睇埋北亞區，仲要直接向集團新任總裁溫拓思（Bill Winters）滙報，認真威水。
不過有賓架認為，喺呢間英資銀行入面，華人升到呢個位已經好難得，未來要再跳上去，未必咁容易。而且，北亞區業務唔多，相信Ben嘅首要任務係切咗韓國業務呢粒大毒瘤，之後北亞都係得番日本與外蒙古。
今次重組，據聞中東與北非區嘅CEO都被炒，東盟區CEO林清德就升做副主席，其他就冇乜重大變動。
咁渣打副CEO李亦思（Mike Rees）又點呢？Winters喺《致員工的信》入面有啲暗示。佢放咗好多筆墨喺邊位主管要report to him呢個範疇，而被架空嘅Rees仍然係一個critical advisor，維持重要角色，要負責客戶關係、信譽風險、品牌同市場拓展，好似真係好critical喎！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文