金融High Tea 2015年7月22日
豬肉股落鑊
2015年07月22日
唔知無消息係咪就係好消息，港股低開後回升，結果升咗131點。要留意係，交投持續減少，得820億，對港交所(388) 好不利，佢昨日逆市跌1.2%。個市升升跌跌，動力都唔係好大，暫時都仲係上落市格局居多。
內地繼續執緊暴力救市後的攤子，《證券時
報》報道，部份配資公司開始主動清理既有存量配資，其中包括限期清理客戶現有A股股票持倉，對停牌個股做出專門處理方案。相關處理有兩個方法，一是自有資金持有；二是提供50%的保證金後繼續持有，並在復牌後一周內視情況賣出。
喺執手尾期間，A股波幅減少，上證指數全日收報4017點，升25點，深成指數全日收報13315點，升113點。港股就靠中移動(941) 撐起造好，一隻股票已為大市貢獻73點，結果收市佢重返「紅底股」，全日升4元，收102.2元；對手聯通(762) 更醒，為藍籌升幅最大股份，收造11.56元，飆0.64元；中電信(728) 跑贏多隻國企指數成份股，收造4.66元。炒電訊股主要係話業績數據唔錯，加上鐵塔公司準備融資，更大理由係市場趨向買入穩陣的大股，於是推高內地電訊股。所以電訊股升其實係大市呆滯的一個表現。
物價急升 不利放水
國企大股撐實，恒生指數收造25536點，升131點；國企指數收報11871點，升97點，成交縮至820億，為近四個月來最少，是連續四個交易日成交少過一千億元。
除咗電訊股，衰咗幾年的豬肉股，因為內地豬肉價格上月升一成，大受追捧。大股萬洲(288) 升2.8%，造5.43元；雨潤(1068) 升2.9%收2.46元。惠生(1340) 急升19%，報1.44元；普甜(1699) 炒高22%，冷門股炒起上來都係細細粒易食。除咗豬肉股，內地農業股都郁。
除權股仔興風作浪
我見到豬肉價升得咁急，有點擔心，經濟未好，豬肉農產品先升，有點停滯膨脹味道，苗頭唔係咁好，若然居民消費物價指數(CPI)升得急，阿爺唔可以再放水。當然呢啲只係遠慮，好短線睇豬肉股就吸引到資金落鑊炒一轉。
A股一輪波動後，部份投資者興趣轉向國企以外股份，趁中期業績公佈前搵啲嘢炒作炒作。友邦(1299) 將於7月24日公佈上半年業績，高盛就估佢上半年新業務價值按年升21%，達至9.58億美元，純利達18億美元，料會派息19港仙。
另一方面，高盛估計友邦(1299) 受惠2014年的活躍經紀業務，會為友邦今年提供良好的基礎增長。高盛話友邦香港與內地業務過去數季銷量與毛利率持續擴張，預料泰國及馬來西亞業務毛利率會有明顯改善，同時相信新加坡業務次季會有復甦。由於預期友邦當地業務受制匯率拉低業務增長，因此調整2015至2017年每股盈利預測至0.3美元、0.34美元及0.39美元，但維持「確信買入」評級，目標價60元不變。
友邦本來係美國AIG屬下公司，金融海嘯後美國政府買起AIG，早幾年部署退市，將友邦分拆上市，掛牌後股價持續上升，至今已經翻了兩番，有中環茶友笑言，政府沽貨唔怕接，呢個智慧香港與美國皆然。
內地資金炒風收斂，股仔變成八仙過海，各展神通。宏霸(2918) 一供五除淨，股價一度大幅攀升，收造0.36元，升幅縮窄至5%，高追咁就中招。同樣供股除淨的中策(235) 都炒作，股價升13%，收0.385元。藍鼎國際(582) 之前公佈的十供一供股計劃僅獲63.62%認購，股價前日大跌17%後，今日收復失地。至於完成供股新貨出籠的錦興(2906) 就插低近一成，收報0.188元，跌近10%，呢批抽水股喺早排大時代就肯定有得炒，依家水頭減少，就變成只可以湧上湧落。
陸羽仁
金融High Tea 舊文