一周三件 - 錢雋 2015年7月22日
一周三件：金榜可塑性高
■任金榜集團主席的王軍，原先是中信21世紀的主席。 資料圖片
中信集團前掌舵王軍，仲有掛住重要銜頭嘅，應該得番金榜（172），集團喺祖國財仔股當中，PB至抵搞，市值兼且只得已經變身阿里健康（241，前身中信21世紀）550億元市值嘅2%，有可塑性。
有超級大孖沙坐鎮
王軍原先亦係中信21世紀主席，上年公司賣盤畀阿里巴巴，王生退任，家陣只擔金榜主席，兼揸住金榜1.26億股或4.6%。而由阿里健康公佈引入阿里巴巴，到呢個月頭港股大插，仲講緊累升10倍，市值550億元，係金榜12.6億元市值嘅43倍！諗到係，金榜有王生呢位超級大孖沙坐鎮，市值又唔係大，又多重可塑性。
排除變身可能，睇番財仔本業。金榜揸住融眾47.9%，後邊融眾，上年度盈利就一支箭增長1.67倍，到2.4億元。又祖國中小企過5,000萬家，係重要經濟動力，而據全球第二大金融租賃企業CIT統計，祖國租賃市場滲透率得5%，比起歐美先進體15%到30%，仲有好大距離，所以佢哋勁睇好祖國市場，兼納為未來重點發展區域。睇到係金榜有實力掌舵，贏在起跑線，加埋集團有隻生金蛋嘅金雞融眾，祖國商機又勁厚，金榜嚟緊日子，繼續掂檔。
金榜喺上周三中港大插後反彈，但現價（0.45元）仲係比5月高位0.79元累跌40%，往績0.54倍PB。場內主打祖國財仔，有中國金融投資（605），往績0.93倍PB、遠東宏信（3360）1.26倍、佐力小貸（6866）1.256倍，中國信貸（8207）3.3倍，金榜起碼平咗37%。又金榜呢期啱啱公佈，融眾有意主板上市，呢壇製作，若順風順水，融眾價值釋放，金榜又有增值空間，PB仲低。短打金榜，當翻半番到0.7元，PB得0.8倍，都仲未追到最近磅嘅中金投0.9倍PB。
錢雋
細價股專家
本欄逢周一、三、五刊出
錢雋
一周三件 - 錢雋 舊文