魚樂無窮：尋找非一般的盈喜股
■中生聯合發盈喜，昨日股價明顯跑贏大市。圖為集團董事長桂平湖。 資料圖片
中生聯合（3332）剛發盈喜，預計上半年盈利將有四成增長，主要受惠營業額增加；消息刺激股價一支箭炒高8%，幾近收復7月失地，明顯跑贏大市。
「咪又係盈喜股一隻，升係好正常囉！」睇真
啲，中生聯合集多種武器於一身，每樣都係獨當一面，絕非普通嘅盈喜股，噚日一記陽燭，相信只係頭盤。
武器一︰派息高。中生聯合2014年初上市，最新一份年度業績開始派息，每股11.93分人民幣，派息比率超過九成，最新息率4.2厘，以增長股嚟講非常吸引，隨著盈利增長，派息有望進一步增加，照秤好和味。
武器二︰估值平。現價市盈率22倍，A股同業如晨光生物、永安藥業、萊茵生物分別為138倍、101倍及81倍，平均計107倍，中生聯合變相兩折大平賣，由於即將回歸A股，肯定變搶手貨，H股股價必定受惠。
武器三︰前景佳。業務主打營養保健產品，生意不愁，最近更有一連串動作。5月底與太平洋保險在線訂立戰略協議，太平洋保險為中生聯合產品提供保險服務，中生聯合產品則會於其網上平台展銷，實行交叉銷售；另外，中生聯合聯同上海復星集團，成功收購紐西蘭同業好健康，後者在當地有近30年歷史，品牌效應巨大，1+1絕對唔止等於2咁簡單！
唐牛
https://www.facebook.com/tongcow88
唐牛
魚樂無窮 - 唐牛 舊文