中環在線：富二三代年薪差距逾千萬
永義太子女 月薪僅5.5萬
■富二三代嘅年薪，可以相差千幾萬。
人工永遠係職場入面最多人八卦嘅話題，城中富二、三代雖然屋企大把錢，衣食無憂，年薪幾多好似都冇乜所謂，但係拎出嚟比一比，原來分別都可以好大。好似早排叫年輕人去少啲日本儲錢買樓嘅華置（127
）太子爺劉鳴煒就年薪過千萬元，小型地產商永義國際（1218）太子女官可欣年薪唔夠70萬元，除開月薪5.5萬元，真係差天共地。
上市公司董事要喺年報披露年薪，近年越來越多本地企業嘅二、三代升做董事，年薪隨即大曝光，呢班富二、三代大部份都係三十幾歲，加入家族企業十年左右，唔少已經袋過千萬年薪。
被認定為新世界發展（017）第三代接班人嘅鄭志剛，佢嘅年薪就數一數二，舊年袋超過1,600萬元，不過佢出名勤力，集團旗下地產、珠寶等生意都關佢事，又致力改善公司形象，人工高都無可厚非。同佢一樣都係34歲嘅劉鳴煒，年薪逾1,200萬元，佢肯定唔使儲錢買樓。
信置黃永光月薪十多萬
不過，唔好以為所有地產商嘅二、三代一定人工高，信置（083）老闆黃志祥出名勤儉，畀阿仔嘅人工亦唔誇張，佢大仔黃永光做咗12年，舊年袋153萬元，月薪十零萬。
人工最一般應該係永義太子女官可欣，永義最新年報顯示，官可欣只得65.5萬年薪。不過又咁講，永義屬於小型發展商，市值得3.8億元，相對新世界發展市值860億元，真係蚊髀同牛髀；而且，官可欣今年30歲，做公司董事5年，年資尚淺，慢慢將公司發展，將來就可袋多啲。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文