女神tea time：重翻「賣殼」舊案
■Juno已經搵到啱行嘅方向，唔知佢爸爸隻中建置地又搵到未呢？
Juno一首《羅生門》，將全人類十年前對《念念不忘》嘅印象完全瓦解、重組，然後發現那個對前度「耿耿於懷」嘅人，原來一直只係一廂情願。Juno雖然係富二代，不過佢對演
藝嘅熱誠係無可置疑。你可以話佢有錢，做到天花龍鳳都得啦。係，不過有幾多人可以決心大到佢咁？雖然一出道畀人笑，之後默默耕耘，去搵自己啱行嘅方向。
講到Juno，佢爸爸係中建系大股東。曾經有人洽購中建置地（261）呢隻內房殼股，但最後談判終止。之後股價就經歷過一段動人時光，越升越有。雖然去到6月見頂後，你望住幅圖，可能會好慶幸自己一早離座，不過事情總有轉機。最近中建富通密密沽出中建置地，昨日收市升11%，顯然已覓得買家接手，有望重翻「賣殼」舊案。
另外，大家亦可留意恒輝（185）。公司5月公佈，正商地產擲7.31億元收購約55%的股權，每股作價0.3305元，並向小股東提出現金要約。最近大市急跌，恒輝股價都算硬淨，只係短暫跌穿全購作價，然後慢慢爬返上去，昨日升半成收報0.42元。下周一就係接納股份要約最後限期，近呢幾日有壓價跡象。近期唔少公司，好似先傳媒（550）、仁天科技（885）過完收購要約限期後就爆上，睇來恒輝都係時候嚟料。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文