中環在線：《誓不低頭》重播必捧場
指不會大跌市 沈大師愛睇秋官劇
■鄭少秋主演嘅《誓不低頭》本周四淩晨重播，沈振盈（左）唔會有秋官效應，陳永陸（右）就建議股民唔使灰心走去煲劇。 
秋官效應果然威力驚人，大台喺4月底重播鄭少秋主演
嘅《大時代》之後，港股即刻唔識升，之後A股冧市，隊散埋港股。大台都唔理股民感受嘅，本周四淩晨拎秋官另一套劇《誓不低頭》重播，最高興嘅，竟然係人稱「沈大師」嘅股評人沈振盈，原來佢係秋官粉絲嚟㗎。
唔講唔知，沈大師𠵱家日日睇實股票機，由細到大就最鍾意睇電視機。近排大台深夜重播幾套舊時劇集，佢唔單止首播時有睇，重播都再睇，《誓不低頭》重播，佢肯定捧場。
估立秋後大市雨過天晴
佢話「可能情意結，總係覺得以前年代嘅無綫劇好值得睇，編劇同情節各方面都好啲。年紀越大，越睇番以前啲嘢，就越覺得有味道」。而且，佢仲係秋官粉絲，最鍾意睇佢做武俠劇，夠曬威風咁話。
所以呢，市場將股災賴落秋官身上，佢肯定要幫對方平反，「秋官效應已經揚到通街都知道，等於洩露咗天機，效應就唔準㗎嘞」，佢指，《大時代》重播時，個市無嘢㗎，係播完先跌之嘛。
佢用玄學角度去分析，預計新曆8月8日立秋後，大市就會雨過天晴，皆因轉季節後，五行都有變化，加上下個月係申月，按統計應該會利好股市，港股應該有得升番上去。
早排喺馬場同秋官有一面之緣嘅股評人陳永陸就比較理性咁話，無論有冇秋官嘅劇集，港股短期都好難急彈，亦唔似會大跌，主要都係睇A股幾時穩定落嚟。佢建議股民唔使灰心走去煲劇，可以做定功課，如果股市再跌唔怕買入心水股喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文