魚樂無窮：賣點多多冷門股
■
人行突然出手，再次將港股踢落無間地獄。 資料圖片
人民幣跌勢停不了，離岸價兩日最多插逾半成，如果做一年期定存，利息已化為烏有，名符其實賺息蝕價。一次性貶值變一發不可收拾，市傳人行尾市仲出手幹預滙價，政策如此甩轆，想取代美國成為第一金融大國？顧掂自己先啦！
人行突然出手，再次將港股踢落無間地獄︰銀行股唔買得，因為多人仔資產；內房股唔買得，因為有美元債；地產股濠賭股唔買得，因為強國人消費減弱……。成交重上千億，港滙亦開始腳軟，同一時間，十年期美債息單日急挫逾4%，德國債券更出現史上最勁嘅負利率，資金避險氣氛異常高漲，新一輪股市走資潮正在上演。
事實上，現時有避險功能嘅股票只得兩種︰1.公用股；2.受惠人仔貶值股份。周初推介嘅利標（787），正正屬於後者，最新更與阿里巴巴及京東洽談合作，帶動股價逆市破位，有貨可續坐。
今日推介冷門股信星鞋業（1170），食正幾個熱炒主題。1.三成收益來自美國，收美金好和味。2.主要生產線在中國及越南，貨幣戰熱打下，成本有望大減。3.連續十多年派息紀錄，最新息率達6厘，避險能力達十粒星。現價市盈率僅11倍，市賬率未夠1倍，公司近期更頻頻回購，喺風雨飄搖嘅日子，有力闖出一片藍天。
唐牛
https://www.facebook.com/tongcow88
唐牛
魚樂無窮 - 唐牛 舊文