金融High Tea 2015年8月13日
震央擴散
2015年08月13日
人民銀行突然變革匯率制度，人民幣中間價周一急跌1.9%，昨日中間價再跌1.6%，引起全球關注，因為中國加入貨幣貶值戰的話，後果嚴重，認真唔講得笑，亦震到港股大跌582點。
中國呢次出招引發全球市場連鎖反應，令股市、新興市場和大宗商品市場受壓，同時
由於資金湧入債市避風，令債價急升。人行都知道呢次行動唔簡單，即刻跳出來解畫釋疑，表明咁樣唔代表人民幣會持續貶值，強調昨日人民幣兌美元匯率中間價大幅調整，主要原因是周一公佈7月份金融統計數據，按新數據進行分析和調整，主要係想提高中間價報價的合理性。
人行解畫 人仔續跌
另外人行講到如果上日收盤匯率較上日人民幣中間價變動較大，會導致當日人民幣中間價有一定相應變幅。周一銀行間人民幣收盤匯率是6.3231元，比周一的人民幣中間價6.2298元，貶值了1.5%，這是做市商在周二提供人民幣中間價的重要參考。
睇完明晒，阿爺即係話呢個中間價係跟上一日人仔的內地市場價(即是所謂在岸價)。問題係阿爺對人仔在岸價理應有影響力，若然阿爺唔想佢跌得咁急，照計有條件托住在岸價；換言之，?家個價續跌，唔多唔少反映中央想匯水低啲，幫助推動番出口。所以我昨日對「人民幣係一次性貶值」的講法有懷疑，如今證明無所謂「一次性」，可以持續跌，或者至少話「可升可跌」，大家要執生啦。
有人會話，人仔貶值會觸發外資流走喎，換轉嚟睇，阿爺可能覺得，外資流出內地有限制，唔可以走得咁急，人仔三扒兩撥下調，外資未必走得切，走就馬上輸咗幾個巴仙匯價。要走資只能調走香港資金，所以香港要捱兩棍先。
高盛首席外匯策略師Robin Brooks話，中國突然讓人民幣貶值，目的是為了因應美國聯儲局預期即將加息，而人民幣可能隨着美元升值，所預先採取的準備動作，爭取到一些政策彈性，「這無疑是合理的」。高盛更預估，美元經貿易加權後，至2017年底還會再升值20%。若然高盛估計成真，港元跟美元升值，即使短期貶值唔多，人仔長遠又跟唔跟美金再升呢？當然，這只是遠慮，不是近憂。
港股無阿爺頂住跌得勁
由於人仔在岸價續跌，內地A股全日波動，上證指數全日收報3886點，跌41點或1.06%。內地個市點都有阿爺頂住，相比香港就變成出氣位。全日沽盤大增下，最多質低恒指672點，低見23826。尾市跌勢放緩，恒生指數收造23916，大跌582點或2.4%；國企指數收報11042，跌221點或2%，成交增至1030億元。港交所(388) 中期業績唔錯，但股價全日跌逾4%，報207元。佢守得住200元大關，已經算佢叻仔喇。另外，受惠人仔貶值的出口股同公用股成為資金避風塘。
人仔下調第二日，首輪震盪震央的航空股繼續受壓，如國航(753) 就續跌5.8%，大行開始發掘其他受害股份，搞到餘震擴散。花旗發表報告，稱人民幣貶值會對內地公用股中的燃氣股影響最大，其次為水務股，估計平均明年燃氣股純利會下跌21.5%，水務股則會降19%，相關股份被拋售。
里昂就人行將人民幣中間價貶值對內房影響發表報告，估計大輸家為中國海外(688) ，其次分別為中海宏洋(081) 及雅居樂地產(3383) ，影響最細為萬科(2202) 。在貶值效應下，華潤置地(1109) 上月銷售佳，股價都要瀉8%，報19.78元，與中海外成為表現最差藍籌；其他跌得甘嘅內房股有綠地香港(337) 、合景泰富(1813) 重創近10%。在這個人仔貶值跌市中，跌咗唔少，?家沽貨已遲，唯有唱住《彼此也在捱》的歌仔，望人仔匯價快點跌完啦。
陸羽仁
金融High Tea 舊文