異動空間：阿爺的私人派對
炒家最驚係乜？唔係股災，而係個市唔生唔死，好似上星期五咁，個市冇波幅，股票打橫行，早排仲有幾千萬元成交一日的細價股，突然間人去樓空，15分鐘都冇單成交，坐在報價機前簡直虛度光陰，不如放假好過！
收市後中證監又派定心丸，話國家隊成員之一的證金公司，未來幾年都唔
會退市，聽到呢句心都寒埋，阿爺暴力救市一個月，嚇走曬外資，沽空又拉又鎖，程式盤又唔准落，轉頭再來個人仔暴力貶值，成個A股變成阿爺的私人派對，真係閒人免進。外資係想玩A股，但阿爺一日唔離場，想佢哋入番去到難。法巴仲出埋報告，提出A股退市七部曲，包括讓停牌中的公司復牌、恢復新股發行、將違規交易事件公諸於世、取消4500點以下不准沽貨的指令等，目的都係提升市場透明度，恢復A股市場機制。但A股從來是一放就亂、一亂就收、一收就死的市場，阿爺要維穩要慢牛，點會咁易放棄操縱權？國企改革概念股成為港股唯一會鬱的板塊，中信系炒上，中糧系亦似會落鑊，如冇心水又手痕，短炒紅籌中國誠通（217）每日都有幾個巴仙波幅嘅。
魏力
http://www.facebook.com/2012jason
魏力
異動空間 - 魏力 舊文