金融High Tea 2015年8月17日

金融High Tea 2015年8月17日
執死雞 食快餐
2015年08月17日
　　過去一周是人民幣驚魂一周，亦是油價破底的一周，未來的投資或炒作，可以從這兩大主題着手。

　　先講人民幣，人仔由上周二開始連跌三日後，上周五輕微反彈，人民幣在岸價微升見每美元兌6.3918元人民幣，全周仍然累積貶值2.8%，中間價全周仍跌4.6%。

　　上周五人民幣匯價反彈有兩個因素︰口術與干預。上周四人行副行長易綱在記者會派定心丸，話人仔在岸價由周二開始累計跌幅3%，矯正偏差經已到位，又否認人行有意令人民幣跌10%以支持出口。人行這個口術在上周四當天已令人民幣匯價初步穩定下來。到周四尾市人仔在岸價拉升，估計人行出手入市支持人仔匯價。

　　人為干預 人仔初定
　　由於上周四收市價回升，上周五早上開出的人民幣中間價跟上周四收市價，微升0.05%至每美元兌6.3975元，當日人仔在岸價一直在每美元兌6.4元左右上落，到收市前半小時突然抽升100點子，收報6.3918元，又出現人為「管理」的影子。由上周五收市推算，今天人仔中間價又會微升50多個點子。

　　照此走勢可以有幾個初步結論。第一，按阿爺官方標準，短期內人仔跌3%就夠，不用大跌。第二，中長線人仔匯價可升可跌，當然阿爺可以不斷干預，但若出現市場重大事件，例如美國加息或中國減息，按理人仔還有向下的空間，阿爺行新制之後要睇人仔在岸價做人，不能說了算，也不能永遠大量干預，所以不能假設人仔不會下跌。所以若出現上述事件，人仔再走弱少少到累跌4、5%不出奇。而人仔上升就要中國經濟明顯改善或美元回落。

　　第三，人仔匯價新制令阿爺減息空間收窄，未來要放水主要可能是降存款準備金率。人行公佈七月內地外匯佔款(即人行接收外匯兌換成人民幣的款項)，按月減少近3080億元，反映投資者大幅度增持美元資產。外匯佔款減少令人行投入市場的人民幣減少，有抽緊銀根的作用，阿爺要在其他地方放水補足。

　　基於上面的推論，不宜再將巨量資金不斷投入作人民幣存款，過去假定人民幣會不斷升值的前提不再存在，要明白人仔可升可跌，要平衡利息和匯價可能升跌的風險與機會，存人仔變成和存澳幣紐幣歐羅日圓一樣，要估估佢升跌才好落注，而決定貨幣升跌主要是利率和經濟前景(含貿易盈餘前景)，若然中國經濟繼續唔好，人仔還要睇跌。當然對應貨幣(主要是美元)的走向也十分重要，對手貨幣走強就要小心。

　　可升可跌　不宜巨注
　　有人話對中國長遠前景有信心就唔怕存人仔，因為人仔始終會升值。我就話即使唔質疑對中國長遠樂觀的前提，呢種說法都有問題，第一，好多愛穩定的投資者夠膽存大量人仔，不敢大量買股，若令佢地繼續對人仔匯價盲目樂觀，我怕呢啲投資者會存得太多人仔，過份暴露在風險之中。第二，對一種匯價會上落的貨幣，要分析其經濟前景和利息政策，萬一中國經濟係咁繼續跌，我又唔知點解存人仔唔使避險。

　　暫時睇人仔短期跌3%差不多，可能仲有少少反彈，但中線睇一年有30%左右機會人仔會再跌，自己持倉要為這種程度的風險作準備。若你將70、80%身家存人仔，放咁巨大注碼去存一種可升可跌的貨幣，可能就暴露太多風險啦。但想減倉也不用急沽，等人仔反彈吓，等存款到期時可減少少倉。

　　油價破位　睇實美元
　　另一個市場大變是油價再插。油價受人仔貶值反映中國經濟轉差和原油供應增加雙重打擊，上周開始破位向下，上周五美國原油期貨一度跌至41.35美元，創近六年半新低，收市止跌回升。紐約期油上周收報每桶42.5美元，升27美仙，升幅0.6%。但全星期累計仍跌逾3%，連續第七星期下跌。

　　老老實實，現在全球金融市場正在大變中，誰人話俾你知佢一定估到一種投資產品的走勢，你信佢三成好啦，現實變化太多，各類投資產品都存在風險，而兩大變數係美元走向和中國經濟，特別是美元走勢，更加對全球各類投資產品的走勢有決定性影響，當然包括油價在內。反映美元兌六大貨幣的美匯指數今年三月見過100的高位，之後回落，然後反覆爬升，現價96.59，到底美國聯儲局何時加息，之後美元走勢如何，都會左右大局。

　　美元在六月中之後從低位再上，伊朗核談判達成協議解除對伊朗石油出口的禁運，到今次人仔貶值令外界覺得中國經濟的問題比想像中嚴重，皆重擊油價。

　　由於油價已破位，市場上較多估計是今年油價會跌到30幾美元的低位見底，然後明年反彈上55美元。不過油價短期會否快速急跌，要睇人仔會否再貶及美金走勢。

　　航空弱勢 或炒反彈
　　有中環茶友問起，油價咁弱，人仔好似只貶3%就定住，係唔係可以買啲航空股炒吓？ 我話候低買少少短炒或者得，但係宜短不宜長。內地航空公司受人仔貶值影響，主要因為佢哋買飛機都是融資性租賃或借錢購買，飛機購買的成本一般也以美元計價，航空公司是高負債行業，因此，人民幣貶值佢哋的債務按比例放大。

　　花旗上周在人民幣中間價第一日貶值1.9%後發表報告，按去年三大內地航空公司業績推算，美元計價債務中，國航(753) 、東航(670) 與南航(1055) 分別為830億元人民幣、790億元人民幣及1050億元人民幣，佔總債務73%、81%及93%。由於美元計價債務比例很大，人民幣下跌令到三大航空公司純利受損。

　　花旗估計，人民幣每下跌1%，會令國航、東航及南航於今年盈利下跌6.4%、8.2%及7.6%，話東航對人民幣貶值最敏感，不過，該行維持內地航空業今年下半年流量增長14至15%睇法不變，並稱雖然上月略放緩，但八月首個星期，已錄得兩成增長，反映業務健康。但估計未來可能進一步減息刺激經濟，將會推動商務客量復甦。

　　大和睇得淡啲，話東航管理層指每1%的人民幣匯率變化相當於6.28億元人民幣的淨利轉變，而該行預料今年底人民幣兌美元將貶值至6.6，即會對今年每股盈利有8%的打擊。

　　大和認為人民幣匯率下降將引發市場對航空板塊的估值下調，令市場擔心下半年貨幣仍會持續貶值，而航油價格目前已在12個月的低位，再下跌的空間有限，故預期市場對航空股的看法轉向悲觀。目前東航估值偏高，東航現估值約1.2倍至1.7倍市帳率，較過去三年的平均值一倍高。決定降低其評級由「持有」至「沽售」，目標價由5.7元下調至4.5元(上周五收5.38元)。

　　所以未來航空股睇人仔和油價會否再跌，形成一負一正的效果，但證券界長線會較有保留。所以我話借住油價插插地，見航空股再回時去執吓死雞，唔係唔得，但轉身要快，否則過兩個月萬一油價跌定人仔再貶時，航空股壓力較大。

　　整體而言，大市經過人仔貶值呢一鑊後，短期因為人仔應暫不再跌，股市會有少少康復性反彈，可以走吓波幅。

　　陸羽仁
金融High Tea 舊文