異動空間：真係彈都唔彈？
炒股一定聽過「別人恐慌我貪婪」，你覺得目前恐慌嗎？如何掌握較為接近事實的市場情緒狀況？不少人會睇散戶調查，如《蘋果》每周會進行電話調查，sample size可達數百，加上隨機抽樣具一定參考價值。上周五調查仍有四成人會積極撈底，恐慌極有限。魏力已分析過，這一
浪是陰跌為主，溫水煮蛙式引人落疊，新聞、報章都未以股市作A1，有效減低市場恐慌，令大戶更順利撤退。但昨日千點血洗過後，恐慌情緒料加劇，環球大冧市隨時變各報章今日A1，經驗所得這是短期反彈的訊號。
衍生工具去睇，牛證死得八八九九，加上本周五就期指結算，大戶或開始平倉食糊，帶動港股來個死貓彈。恒指9 RSI去到8絕對係金融海嘯級數，通常唔會企太耐。去年低位21137，昨日最低21136，去到這個敏感技術位，通常會頂到一陣，之後再尋底。全球正面對商品、股、滙、債市連環爆煲慘況，商品已爆、股滙為目前風眼，債市也難倖免。美元萬劍歸宗，揸金不如揸現金。最後，萬達商業（3699）突暴瀉17%破底，首富魔咒又再靈驗！
魏力
http://www.facebook.com/2012jason
魏力
異動空間 - 魏力 舊文