陸羽仁 BLOG 2015年8月25日
逼迫儲局
2015/08/25 08:51:30
網誌分類: 經濟
全球股市暴跌潮愈捲愈大，上證綜指大跌8.5%至3210點，恆指跌5﹪，暴跌浪蓆捲至歐洲，德國及法國股市分別大挫4.7%及5.4%！
跌浪去到美國，投資者已經嚇到面青，美股開市唔夠5分鐘，杜指已狂瀉1089點至15370點，
其後一度大反彈，至中午，跌幅收窄至115點，但午後又再回落，收市跌588點，收報15871點，跌幅3.5%，已經叫做跌少一半，坐咗半架過山車。標普500指數跌得更傷，跌3.9%至1893點；納指跌3.8%至4526點。投資者有幾驚？睇股市恐懼指數昨日抽升45%至40.73，接近4年高位，便可見一斑！
港股美國預托證券ADR港比指數收市較香港再跌593點至20659點，雖然繼續向下，但跌幅已較上日大為收斂。
美股跌到觸發所謂隔斷的停牌機制，杜瓊斯公司表示，每逢交易價格上升或下降5%以上，都會令到交易暫停5分鐘，而昨日，股票加上基金交易，全日共出現超過1200次的暫停交易，可見大市的動蕩情況！當中暫停最繁密的時段在早段，這段時間，納指由朝早勁跌8.8%，曾經逐步反彈上只係跌0.5%，其中蘋果公司股價一度由下跌1.5%反彈至倒升2%。
美股暴跌，美元亦受到影響，兌六隻主要貨幣匯價嘅美元指數昨日大幅回落1.7%至93.42，接近5月11日的低位，較3周前超98，已大幅回順近半成。另外，股市唔掂，又驅使資金流入美債避險，美國10年期國債息昨日跌至2.01厘。由8月初至昨日，已下跌超過0.2厘，息率回落近一成。
全球股市爆災，投資市場大幅波動，主要都係中國經濟不濟，股市大瀉與人仔突然貶值惹的禍，另一個因素，就係聯儲局的加息動向，亦令到投資者有所避忌。
保誠金融的市場策略師Quincy Krosby指出，市場將聚焦中國今日會否出臺新招去刺激經濟增長。有嘅話，大市可能會穩定下來。而家美國市場普遍預期中國人行會降準救市。美國投資者由一個月前一大彈中國入市救市，到而家見中國停咗入市，開始期望中國救市，可見跌市燒到自已身上時，睇嘢角度會唔同咗。
有CNBC記者問諾貝爾經濟學獎得獎者席勒（Robert Shiller），大市已經跌得咁多，對後市點睇，佢話好難睇到大市短期的走向，但可見預見嘅係當大市出現大跌，短期內都會製造另一個餘震（aftershock），至於向邊個方向走，就好難講啦。佢指出美股大跌在意料之內，因為股值已很高，另外，當之前唔多理會股市的投資者都入市買股，大市嘅購買力已經消耗得差唔多啦。佢強調，股市跌得咁急，主要係投資者注意力過份集中在最新消息，換句話講，就係太過短視，見到股市跌，就驚到鼻哥窿無肉，無厘頭地沽貨，佢提醒投資者，從長遠角度睇，大市出現調整，唔係世界末日。佢認為中國經濟會重現再增長（renewed growth），美國房地產市場亦會回復健康。
對於聯儲局加息的問題，前美國財政部部長薩默斯（Lawrence Henry Summers）昨日在金融時報（Financial Times）撰文，話美國現在加息，將觸發危險的結果，佢話加息將打擊到美國就業市場，因為利息上升，投資者會覺得持有現金比投資吸引，另外，加息亦會令到美元升值，亦削弱美國製造商的競爭力，首而美國的貿易夥伴受到壓力。
薩默斯認為要美國有令人滿意的增長，需要一個低息環境。特別係現時全球經濟環境脆弱、加息將觸發不可預料及危險的結果，可能會把金融系統帶來危險（crisis）。所以聯儲局不應做任何事情。在決定加息之前，一定要做好推動公共及私營部門的投資，以保證全民就業。除非做好上述工作，或者美國出現急劇通脹、又或者經濟及市場都變得非常熱，聯儲局根本就沒有改變目前利率政策的需要。
其實市場對中國期望已不大，而家主要睇美國9月加唔加息啦。呢個環球跌市，正在逼聯儲局主席耶倫不要加息。
陸羽仁
回應(0) 我想回應
陸羽仁 BLOG 舊文