智取大市：
尋找終極撈底機會
呢一輪跌市嘅致命傷，就係太好撈，27000點又話抵撈，26000點又話係黃金入市位，25000點又話要入最後一注，有錢一早撈曬貨。至於睇淡就一直食花生，形成呢一刻散戶一係揸成手貨，一係無貨。
揸成手貨嗰批，面對沽又唔係、揸又唔係嘅情況，你同佢講乜分析都冇
用，因為只有運氣先幫到佢。
至於另一種人，就係揸成手現金，喺場邊食花生，因為佢哋覺得錢唔使輸已經萬幸，但亦不認為喺股市大跌之下有能力把握撈貨機會。
事實上，能夠喺今次跌浪之中獨善其身嘅散戶，先至最有能力去把握未來嘅反彈浪，一個可能令身家進賬幾十巴仙的機會。
喺跌市選擇入市位，重點係要知道股市而家賣緊乜價，未來會否賣得更低價，然後估計大市最低限度會反彈到乜嘢位畀你沽貨。
首先，閣下可以用大市估值，去量度究竟港股係賣緊一個乜嘢價。
隨時兩周內出現
如果怕近年企業盈利水份較多，用市賬率取代市盈率計價，就能比較歷史估值，目前恒指市賬率大約1倍計，可以話市場已預期藍籌企業盈利出現大幅倒退，賬面值只能極低速增長甚至呈現短時間嘅衰退。
過往20年，恒指賬面值只有喺大跌市階段出現倒退，包括1998年金融風暴、2008年金融海嘯等等大熊市，而以過往30年往績，恒指賬面值衰極都只有一至兩年下跌。由此可見，恒指足夠反映短期熊市低谷估值。
估值夠低，只不過恐懼可以無限放大，所以量度市場最驚可以有幾盡，不如用技術指標比較歷史仲實際。
以過往30年恒指9周RSI比較，最悲觀情況下，可以跌至10水平，目前9周RSI已跌至15左右，距離30年低位嘅10僅一步之遙，以近期跌市速度睇，呢個底部有機會喺兩個星期內出現。
另外，噚日恒指9日RSI跌到10以下，喺過往港股RSI嚴重超賣必有底背馳嘅定律之下，即使短期內有反彈，肯定其後會急跌多一浸，先有機會見中線底部，到時咁啱9周RSI跌到30年低位，同時估值已達爆煲價，真正黃金入市位先至出現。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文