一周三件：中傳動勝在平
■胡曰明任主席的中傳動，在同級數環保股當中其PE及PB係至平霸一族。 資料圖片
阿爺又快開五中全會，市場搵焦點，環保幾乎肯定係鐵膽。揀隻平嘢買，買中傳動（658），喺同級數環保股當中，中傳動PE、PB又係至抵搞。
食正國策需求增
中傳動上年呢瓣業務營收58億元（
人仔．下同），佔總業務70%比重。又單係今年上半年，全國風電總投資累計680億元，同比增加40%。阿爺規劃去到2020年時，風電裝機容量要去到2億千瓦。十三．五臨近，祖國報載，環保部正係加快制訂環保規劃，業內專家預計，包括水、電等環保投資額，達到6萬億元！食住國策，風電組裝投資需求繼續，中傳動keep住肥仔水。
中傳動上年出售合營公司虧損1.3億元，今年無呢個影響，盈利上到3億元。好似上邊講，食住環保大潮流，中傳動主打瓣數有計，加埋自然增長，今年成績單仲掂！場內專業評估，中傳動今、明兩年EPS0.57同0.64元，增長260%同12%，明年預測PE得9.5倍，明年預估PB亦只得0.76倍。環球同樣主打風電設備，有航天萬源（1185），冇預測PE，1.4倍PB、金風科技（2208）明年12倍預測PE，1.8倍PB、祖國泰勝風能（深300129）明年30倍PE，2.7倍PB、丹麥Vestas Wind19.6倍PE、3.5倍PB，中傳動已經平霸！
今年4月中傳動一批工業用地被收儲，獲補償13億元，估計變現收益3億元。計埋呢壇非經營收益，中傳動嘅預測PE扯到仲低！買中傳動，當追番上最近磅嘅金風科技明年PE水位，中傳動現價（6.04元）係咁意都要升26%，到7.7元。
錢雋
細價股專家
本欄逢周一、三、五刊出
錢雋
一周三件 - 錢雋 舊文