金融High Tea 2015年8月5日
油價跌要識揀股
2015年08月05日
內地股市回升，港股仍然乏力，整體氣氛仍然懶洋洋，繼續處於夏日悶市的格局，反而係外圍油價，前晚再出現急插，風高浪急，睇落仲刺激。
油價在外圍急挫，市場說法係美國汽油消售疲弱，加上美國及內地經濟數據欠佳，市場擔心原油供應過剩，布蘭特期油曾經跌至49
.36美元，是今年1月底以來的低位，紐約期油最多跌至45.08美元，則是四個月新低。
「三花聚頂」似再尋底
除了經濟基本面，其實油價腳軟仲有一個因素，就係伊朗供應回升。本來伊朗核問題解決，重新可以賣油，數字先前已經斟好。突然增加的一個因素，係市場原先預期復產初期每日產油係五十萬桶，最新消息係伊朗生產設施修整會比估計快，跟住就會回復日產一百萬桶的水平。由於供應增加比想像中快，油價於是提前跌咗落去。伊朗加快投產係不可忽視的因素。
現時油價不振，成因包括供應增加、美元強勁不利商品，以及中國增長放緩，變成「三花聚頂」之局，形成重壓，睇嚟油價有可能再試今年低位。
能源價格基本上係生產主要成本之一，油價跌理論上係利好因素，對用油行業唔係壞事，關鍵係油價下跌成因，有幾多係因為需求不振引致。因為需求差等如經濟力度不足，如果生意難做，咁就算成本減輕都無用啦。呢次油價下跌係多種成因，部份係中國用油減少，咁反映內地製造業仲係麻麻哋，呢類股份應該避開。
油價再插，推動航空股昨日造好，國航(753) 收造8.47元，抽升逾9%；南航(1055) 飆8%，造8.05元；東航(670) 相對弱啲，都升5.4%，造6.61元；國泰(293) 升1.1%，造18.46元。中石油(857) 受累油價，就創出一年新低，報收7.36元，跌咗1.47%，頗有黃台之瓜，何堪再摘的味道。
蒙牛跌完再跌
要揀石油下跌受惠股，既要佢因成本下降得益，同時仲要生意繼續有得做，依照呢個條件，航運股用油成本下降，但運貨量可能同時減少，受惠程度就無航空股咁明顯，所以過去我經常話航空股唔怕低吸。不過，航空股升多跌少，股價開始反映利好因素，變得唔係好似以前咁平，所以高追就要留意水位仲有幾多。
五間證券商即日起暫停A股融券交易，部份內地證券股反覆偏軟，睇嚟內地維穩策略係跌到咁上下就會托一托，所以個市未有條件大升，但講到底都仲係有阿爺係度指揮嘅市場。
A股叻番日，內地股市收市後，港股就再度回軟，最終恒指收造24406點，跌5點。被高盛唱衰的蒙牛(2319) 再挫4.17%，收32.15元。
陸羽仁
金融High Tea 舊文