滙海探戈：
紐元形勢不妙
儲局本周議息，本港周五淩晨2時有結果，各界屏息以待，除咗因為市場睇唔通外，連環球多國就應唔應該加息，出現南轅北轍嘅立場，情況算係罕見。
央行隨時再減息
由發達國揸莊嘅國基會和世界銀行，近期先後開腔指外圍風大雨大，告誡儲局咪加息住。印尼為首嘅新興市場國家，就猛
叫耶倫快啲加息，以消除不明朗因素，減輕佢哋嘅走資壓力，等佢哋唞下氣。
利率期貨顯示，儲局禮拜四加息機會率只有28%，但華爾街班analyst就估機會一半半。不過，市場共識係，即使儲局禮拜四嚟料亦只會係dovish hike，即係加息純粹為交差，等大家唔使再囉囉孿，之後唔會咁易梅開二度，等大家釋懷。
筆者認為中國隱憂和商品市場低迷的影響未浮現，低通脹隱憂未除，儲局本周按兵不動是較穩妥做法，當地就業市道的確唔差，尤其上月職位空缺創新高，只要中國唔陀衰家，儲局今年加息仍冇走雞。
環顧上周滙市，儲局議息前好友平倉觀望，美滙指數上周下跌1%，商品貨幣挾淡倉情況最明顯。
論短期前景，紐元形勢恐怕更悲觀，事關新西蘭儲備銀行上周減息至2.75厘後暗示未減完，有分析甚至估計再減兩次，紐元今年內會跌穿60美仙，即較上周收市的63.12美仙再跌近5%。
奇兵
本欄逢周一刊出
奇兵
滙海探戈 - 奇兵 舊文