一周三件：
丹楓銀彈煞食
■丹楓透過聯營持紅山半島，今年於市場密密沽售。 資料圖片
丹楓（271）透過聯營所揸紅山半島，原來今年以嚟，已經密密喺市場沽售，丹楓呢家原本係淨現金嘅企業，有機會進一步強化銀彈，兼為未來業務壯大，鋪好條靚仔路。
目標睇升26%
丹楓上半年成績單公佈，去到上月
尾半年度公佈日，聯營所揸紅山半島117個住宅單位同267個車位，有81個住宅同114個車位，已經售出，而當中，5個住宅同7個車位完成買賣出售。又若果剩番76個住宅順利完成，單係已售項目，可以為丹楓帶嚟5.25億元淨額。同樣8月尾，丹楓亦公佈，聯營會另外出售48個別墅，丹楓應佔潛在變現10億元。
丹楓最新揸淨現金4.2億元，已經係淨銀彈企業，若果上邊物業出售，順風順水，保守計，集團實收淨現金，應該過10億元，淨現金亦起碼超過15億元，丹楓家陣總市值都係16.7億元咁大把！
又打從2003年沙士之後，紅山半島為丹楓帶嚟極肥仔增值，但始終係賬面數。而喺物業咁大價值基數下，要再帶嚟超厚增值，有難度，反而積極變現，將增值變為實淨淨現金，絕對無壞，而勁厚銀彈，就係未來資產業務進一步壯大嘅優勢。上期主打丹楓，已經係今年頭，丹楓當時由0.88元一枝箭升咗1.8倍，到4月20日2.48元。呢轉丹楓因應時勢，先喺7月以嚟，喺1.12到1.5元橫行區炒上落。
又若果紅山半島出售，keep住有好消息，先揸實一注，博上到5月另一個橫行頂1.7元，現價（1.34元）計，亦有26%回報，有魚有肉之餘，丹楓0.4倍PB，未有耐炒過龍。
錢雋
細價股專家
本欄逢周一、三、五刊出
錢雋
一周三件 - 錢雋 舊文