中環在線：笑稱影彌敦道夠開展覽
水禾田貪吉舖多
■水禾田現時多數時間住喺廣州，返嚟香港係為搞畫展。 高淑嫻攝
藝術可以係天馬行空，亦可以相當貼地。以攝影聞名嘅水禾田平時較多時間留喺廣州嘅工作室，但佢其實相當留意香港嘅經濟與社會狀況。早前見到佢老人家，問佢幾時舉行攝影展，佢笑笑口話，
只要喺彌敦道行一轉，已經有足夠材料舉行攝影展，事關條街有唔少吉舖！
近月本港零售市道差到浮曬上面，有中環名店提早退租，尖沙嘴、銅鑼灣等旺區吉舖越來越多，業主願意劈租嘅消息此起彼落，羅素街都有靚舖由鐘錶店變短租零食散貨場，果然係此一時，彼一時。
■呢幅《清醮花牌．香港》係喺《蘋果日報》（小圖）上所畫。 雨傘運動影集未擬出版
難怪水禾田都話，「𠵱家行彌敦道，左邊行一次，右邊行一次，（影低嘅相）已經足夠用作舉行一個展覽，因為有唔少吉舖」。
除咗留意本港經濟市道，舊年雨傘運動，水禾田都有身處其中，影低好多畫面，編成一本攝影集，但因為種種原因，所以冇出版，只成為佢個人收藏。
水禾田𠵱家分別喺香港、加拿大與廣州居住，留喺廣州嘅時間最多，佢主要認為香港冇藝術氣氛，每次開電視，唔係見到一班立法會議員，就係梁振英，令佢失卻創作靈感。佢最近留港主要為一個名為「雙城記」嘅畫展。
水禾田以攝影聞名，未必人人知道佢同樣喜愛畫畫，亦多次舉行畫展。查實佢年輕時學設計，先學畫畫，再學攝影，攝影成績又超越畫畫。佢今次呢個畫展，畫作題材主要圍繞香港與溫哥華兩個地方嘅景物，特別之處，係佢喺兩地嘅報紙上畫畫，報紙印有日期，可以順便作一個歷史記錄。
今日大家都討論紙媒沒落，水禾田就認為報紙與雜誌好重要，屬於大家生活一部份，「應該享受飲杯茶、揭嚇紙；拎住iPad睇文章始終少咗一份味道」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文