笑到最後：
國足示範國企改革
上個星期中國最大件事，唔係A股假後重開，而係世界盃外圍賽中國足球隊以0-1輸畀卡塔爾，最抵死係賽前中國隊言論，根據《南方都市報》10月7日體育版，「國足隊員們的感覺是這支卡塔爾實力一般」……
結果，強國國足竟然輸波，一如上次中國對香港一樣，賽前話輕勝，
最後被逼和。再一次證明，現代中國人嘅所謂實力，只係喺嘴皮上逞強，對圍內中國人仲可能蝦蝦霸霸，一遇到稍為認真嘅國家，就會出事。
強國踢完波，港中大戰11月先踢。目光又再次番去經濟，嚟緊一件大事係五中全會，7月「中共中央政治局會議」決定10月召開，但有內地傳媒推測會喺10月15號至18號開會，即係嚟緊星期四就會開，夾返會後習近平夫婦10月20號到23號去英國進行國事訪問。
據講，五中全會嘅五年規劃可能會推出穩增長措施，因為經濟放緩緊。高明一聽，即刻諗起本欄核心價值之一：多數中央有好嘢，都係隊畀你散水。
不過，過去習總三同四中全會，以恒生指數反應計都係成功，特別係2013年嗰次，會議完結以為冇料到，之後出咗個《關於全面深化改革若幹重大問題的決定》堅講改革，11月份升到去2月份。2014年尾，因為中國孖展增加緊，其實講乜都會升，但尊重數字，四中全會後都係有好表現。
恒大引外援變亞洲冠軍
今次同之前唔同，就係中央支神奇魔術棒失效，除咗救市越救越跌之外，中國訪問美國，竟然可以空手而回，同期更有教宗、印度總理訪美，令堂堂強國元首訪問，降格成朝貢美國其中一員，最後仲俾美國以發現「火星有水」嚟展示真正國威。
五中全會，最有可能係：一、會後恒指升一成之後冇力，畢竟近日反彈約兩千點已經透支部份開會好消息；二、可能真係有國企改革，例如油股，上個星期大升，表面上因為國際油價升而跟升，實際上或者同會議有關，但高明中南海冇線，只係估嚇。
最後，國足口頭勁實際仆直，反映「國情」如是。但中國足球唔係一面倒屎波，恒大足球隊就係例外，「恒大模式」高薪禮聘強勁「外國勢力」做主力，中國人行埋一邊做配角。恒大（3333）虛心相信外國人比中國人優勝，最後贏咗亞洲冠軍。
中國國企如果為國家好，都要向恒大學習，支持外國企業自由進入中國競爭，國企唔止唔應該反對，仲要列隊支持洋人來華救國救經濟，然後匿埋一邊做閒角。呢啲先係真正國企改革。
高明
https://www.facebook.com/bigricetea
本欄逢周一刊出
高明
笑到最後 - 高明 舊文