一周三件：中糧油煲重組
■中糧油現價2.97元。圖為集團董事總經理嶽國君。 資料圖片
中糧係場內熱煲重組改革其中一系，系內中糧油（606），現價插到近2008年海嘯水位，PB仲要低過海嘯期，兼且係成系最平。又博成系重組，中糧油大翻身，喺呢個超殘價向上，咁就和味！
中糧油現價（2.97
元）比2010年高位12.2元，大插76%，幾乎跌到近2008年10月海嘯期間，當月收市價2.55元，家陣得0.56倍PB，低過海嘯期0.77倍PB，比起2007年上市以嚟平均1.27倍PB，係折讓咗56%！
等業務大翻身
仲未止。中糧成員中糧屯河（滬：600737）家陣高達5.36倍PB，其餘的中糧生化（深：000930）5倍、中糧地產（深：000031）4倍、蒙牛（2319）2.2倍、中糧食品（506）1.76倍、中糧包裝（906）0.85倍，大悅城地產（207）0.57倍。中糧油PB，系內平霸！
中糧系統，係阿爺點名首批重組改革先頭部隊，係重組大熱。而中糧油主打其中油籽等食用油瓣數，同系嘅中國食品，亦有推出食用油產品，成系架構，係有理順需要。而更重要係，國企重組改革，斷唔單單係上邊所講架構理順咁如此這般，點樣透過產業行業升級，或加或減，去提升個別企業盈利同經營優勢，至係要點。中糧油上年度出血過7億元，今年上半年出血少咗，但未止到血，仲係見紅2.7億元。所以，成系若果重組，斷估母企唔會加重中糧油負荷，要佢硬啃繼續出血。正路諗，反而點向中糧油唧好嘢，或者輔助中糧油業務大翻身，呢個先係point。
煲中糧油，先博上番去2008年0.77倍PB，中糧油都講緊要升37%到4蚊。
錢雋
細價股專家
本欄逢周一、三、五刊出
錢雋
一周三件 - 錢雋 舊文