一周三件：銀河證券好抵
■銀證今年上半年盈利56億元人民幣。圖為集團董事長陳有安。 資料圖片
銀河證券（6881）啱啱獲納入港股通無耐，係五隻北水可以trade嘅券商股中，最抵搞嘅一隻。港股通新調入銀河證券、海通國際（665）同國泰君安（1788），連同已有嘅中信證券（6030）同
海通證券（6837），總共五隻券商股。銀河證券短短五個月插咗50%，現價（6.7元）去番2013年時水位，比起今年6月底NAV6.92元，得0.97倍PB。
今年業績有保證
場內專業預估，銀河證券明年得0.9倍PB。主打祖國嘅中信證券，現1.27倍PB、海通證券1.2倍，明年預估PB係1.15倍。主打香港嘅海通國際，現1.05倍PB，明年預估1倍PB，國泰君安最貴，明年2.4倍PB。銀河證券點都最抵！
銀河證券今年上半年盈利56億元人仔，超過上年全年37.7億元人仔，今年下半年，盈利就算點倒退，銀河證券全年成績單，亦都勁靚仔。又十一假前，A股仲懶懶閒，但假後，融資又開始嚟料，總計10月兩融餘額，又逼近1萬億元水位！睇到亦諗到，融資活躍番，A股有水到，而經歷7月慘痛大插插，相信阿爺唔會忽然大閂水喉，內地券商股包括銀河證券，繼續有運行。
銀河證券今年特別好成績，基數擴大咗，場內專業評估，銀河證券明年EPS會倒退到0.85港元。就算係咁，呢個EPS仍遠超過再對上幾年水位，明年得8倍預測PE，又係五隻港股通內地券商股中，至抵搞一隻。北水要揀，會點揀？買銀河證券，當上番7月時大反彈高位8.8元，銀河證券要升32%，明年預估1.2倍PB，先追到上邊兩隻內地券商股PB水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文