一周三件：國美奀爆抵買
■國美1,714家門店的銷售總額超過42億元人民幣。 資料圖片
國美（493）預測PE比行家平咗一大截，市值奀到爆，對買開高PE溢價嘅大小北水嚟講，更加係超值。
啱啱8月，超級大哥大阿里巴巴以約341億港元入股蘇寧（深：002024），做蘇寧第二大股東。阿里
呢個出價，只係佔蘇寧已擴大股本約20%，但已經等於1.5間國美（國美市值226億元）！又蘇寧總市值1,436億港元，係國美市值6.4倍。同樣主打祖國嘅京東（JD），市值2,894億港元，唯品會（VIPS）亦講緊900億港元，係國美4倍市值，國美奀豬到呢。
實體零售網超班
場內專業評估，國美今、明年兩年EPS9.7港仙同0.11港元，明年得12倍PE。蘇寧明年預測PE，講緊300倍，京東135倍，最平唯品會，都講緊23倍。
國美家陣盈利貢獻，仍主要嚟自線下實體商店，但咁睇，行家蘇寧PE唔係平，都獲阿里入股，有估計，阿里其中一個好處，就係可以分享到蘇寧線下實體店網絡。家陣國美實體店網絡總數，超過1,200間，又據報道，國美上月推「9.17親友福利日」，連埋非上市店舖，總數1,714家門店嘅銷售總額超過42億元人仔，創咗中國家電零售市場單日最高銷售紀錄。國美實體零售網，亦係超曬班，但市值、PE都平到無譜！
北水喺7月港股大插插以嚟，再密吸國美，唔經唔覺，又揸咗國美達7.3%，兼等於大股東黃光裕等一致人士權益嘅20%水位。國美預測PE平咁多，北水一樣識貨。買國美，當現價（1.34元）翻半番到兩蚊計，明年先得18倍PE，市值340億元，邊有耐追到行家？
錢雋
細價股專家
本欄逢周一、三、五刊出
錢雋
一周三件 - 錢雋 舊文