中環在線：馮景禧創立新證 超人曾幫百富勤
華資券商 80後識幾多？
最近睇一個台灣綜藝節目，幾位「七十後」藝人向一班十幾歲學生，分享少時玩意與日劇偶像，整整一小時節目，班學生只有O嘴，完全唔知對方講乜東東。忽發奇想，換咗係財經界，香港「八、九十後」嘅小股民，對於曾經紅極一時嘅本地證
券行又知幾多呢？聽過未呢？
香港證券界𠵱家可以話係中資與外資行嘅世界，好多華資行嘅老闆年紀有番咁上下，加上冇乜肉食，都冇心戀戰。但其實本港喺不同時代，都有一兩間紅極一時嘅華資行，老一輩茶餘飯後一定提起新鴻基證券。
馮景禧創立嘅新證，素有「金融界少林寺」美譽，港交所（388）前行政總裁周文耀、載通（062）副主席陳祖澤都係新證出身，就好似有Q嘜保證。
【80後Cal識幾多間？】
大福掀起股評人熱潮
「六、七十後」應該對大福證券與百富勤有印象。大福證券最出名，係出咗資深股評人陳永陸（陸叔），佢1990年加入大福後，一路有幫電視台、電台做訪問，講股票，帶起股評人熱潮。
至於本地投行百富勤就最巴閉。1988年梁伯韜與花旗前上司杜輝廉創立百富勤，邀得交情深厚嘅「超人」李嘉誠支持。百富勤食正中國企業開始出外上市呢條水，幫上實（363）、北京控股（392）等多隻紅籌上市，梁伯韜因而有「紅籌之父」之稱。可惜敵唔過97年金融風暴，清盤後賣咗畀法巴。
今時今日，大家最記得嘅本地證券行，大概都係成日賣廣告嘅耀才（1428），佢5年前上市集資，水頭充足，加上有「大隻佬股評人」郭思治坐鎮，又要低傭金，輕易成為散戶至愛喇。
只可以講一句：Those were the days.
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文