魚樂無窮 - 唐牛 2015年10月8日
魚樂無窮：賺35年錢速成法
■大市欲罷不能，調整一日後再向上衝。 李潤芳攝
大市欲罷不能，調整一日後再向上衝，恒指挾千億成交突破22200阻力，更企穩50日線之上，乃4個月來首次。數數手指，港股10月累升1,669點或8%，月初叫大家買盈富（2800）嘅策略尚算合格，起碼唔會跑輸大市。
今日A股復市，港股會否無以為繼？抑或發力再上？觀乎今個月嘅大事，不外乎儲局議息及中國五中全會展開。美股近期同港股同樣強勢，似乎已預示今次仍非加息時機；五中全會則將制定十三五規劃內容，以近期弱爆數據睇，阿爺再出招挺經濟變得理所當然，事實上，汽車及內房已搶先鬆綁，其他板塊有望輪流放煙花。從圖表出發，恒指雙底升穿頸線，下一目標先睇24000點。
日東科技（365）連日整固後發力，圖表呈破旗格局，劍指一元大關！「呢隻老牌工業股，五年加埋只係賺4,300萬，憑乜炒上去呀？」正所謂生意淡薄不如賣殼，日東市值4.3億，兩大股東持貨逾五成，業務卻無甚寸進。如果用殼價六億計，兩大股東肯割愛嘅話，可以穩袋3億，等於過去五年賺嘅總和7倍，由此引伸，一個動作可以搵夠35年嘅錢，誘因大到不得了。正當創業板啤殼工場瘋狂趕工，日東呢啲平靚正潛在主板筍殼，絕對係可遇不可求，等通告話有賣盤意向先入場就遲喇！
唐牛
https://www.facebook.com/tongcow88
唐牛
魚樂無窮 - 唐牛 舊文