陸羽仁 BLOG 2015年10月8日
中國穩定番
2015/10/08 08:56:56
網誌分類: 經濟
港股升番684點，經紀張話啲散戶都開心番，呢一排大市唔好，好客都唔打電話俾佢，直情有無眼睇的感覺，呢一兩日電話多番，問吓價，雖然無乜買賣，但聽得出心情好咗。
隔夜美股又上，杜指及
標普500指數分別向著17000點及2000點進發。杜指漲122點，收報16912點，升0.7%；標普500指數升16點，收報1996點，升0.8%；醫藥股顯著反彈，納指跑贏大市，升43點至4791點，升0.9%。
美股又升，大陸假後開市，兩邊都升，港股開市都利好，但短期升得多可能回吐。另一方面，大市市底都好轉，之前無升的股份，可能會追吓落後。
美國昨日無乜重要經濟數據出爐，比較影響股價嘅係美国原能源局公布最近一周的庫存量增加310萬桶，遠高過市場的175萬桶預期，令到連彈幾日嘅油價回軟，紐約油價由每桶49.5美元跌番去48美元邊緣，令能源股的近期的強勢反彈稍歇。回顧美股近期的升勢，主要拉力來自大宗品市場回揚，壓住大市的則係醫藥股，可能係跌得太多，昨日出現明顯反彈，雖然重磅股蘋果公司跌1%，仍能帶動納指跑贏大市，安碩納指生化科技股票基金昨日就追回部位失地，大升2.5%。
市場氣氛近日轉好，股票恐懼指標VIX指數，不斷下降，昨日再跌5%至18.4，一個對後市比較樂觀的水平。市場變得比較牛，分析普遍認為係聯儲局推遲收緊政策或者美國經濟強勢所致。不過，CNBC人氣節目《Mad Money》的主持人Jim Cramer又唔係咁睇，佢認為大市近期的強勢，其實來自中國。佢喺節目中表示，投資者其實睇好中國經濟前景，預期中國將會有比較靚仔嘅數據出台，所以加大注碼。呢個現象與上日提到嘅國基會（IMF）同野村對中國經濟的樂觀睇法不謀而合。
Jim Cramer話有幾個信號可以睇到中國經濟復甦的希望。首先係一向唔睇好礦業股的摩根史丹利改變態度，睇好兩隻礦業股巨頭，澳大利亚必和必拓集团（BHP Billition）及力拓集團（Rio Tinto Group）。而這兩隻股係中國建造業上升的繫玲羊（Bellwether），或者係中國建造業的直接受惠者。
其次係全球最大的銅金生產商 Freeport-McMoRan的走勢，呢隻股因為中國經濟放慢，銅材料需求大減，銅價大跌，股價年內大插44%， 不過，近期忽然有番起色，昨日受惠銅價回升，大彈9%。同樣地，主要供應中國開採煤礦設備嘅生產商Joy Global，股價今年大插63%，亦於這幾日內由13美元跳升上17美元。這些都是顯示投資者對中國經濟有望復甦的跡象。
Cramer甚至認為油價近期的強勢，亦與市場預期中國經濟復甦，不無關係。佢話中國人此前因為想一朝致富而試圖狂谷股市，結果搞出個大頭佛，現在似乎已接近搵到點燃實體經濟的最終途徑。
我就話中國經濟是否轉型成功，言之尚早，但商品和礦業股跌得太殘，在10月有個似樣的反彈，都好正常，中國經濟要睇到明年初先知大勢。但無論如何，中國因素穩定番，外資睇番好少少，中期大市仍在一個反彈勢頭中，可以反幅再上吓。
陸羽仁
回應(1) 我想回應
陸羽仁 BLOG 舊文