魚樂無窮：
細細粒國企撻著
■五菱汽車噚日逆市炒高8%；圖為集團執行董事孫少立。 資料圖片
法國遭受恐襲，環球股市卻異常冷靜。港股開市即見全日低位，其後跌幅逐步收窄，埋單企穩23000，表現較上周五無厘頭跌市為佳，A股在多個壞消息夾擊下更倒升近1%。執筆之時，英法德股市齊齊造好，道
指期貨亦轉跌為升，有心人借恐襲沽空搵番筆嘅如意算盤，今次明顯打唔響。
異動股可留意五菱汽車（305），噚日逆市炒高8%，收報0.71元，成交倍增之餘，更突破早前供股價，值得雙倍關注。公司6月底曾宣佈五供一，集資2.1億，供股價0.7元，由於阿爺暴力救市，供股反應欠理想，申請比例不足七成，在包銷制度下，兩大股東最新持股超過七成，以市值13億計，街貨只值幾億錢，國企嚟講好好炒！
甚麼原因惹來炒風？睇番噚日成個板塊，升得最勁嗰隻叫泰坦能源（2188），做電動車充電樁嘅。哎呀！唔記得話你知，五菱除咗做汽車發動機及部件，以及汽車零部件及附件外，與上汽集團及通用汽車組成嘅合資早前宣佈，將投資30億起廠，全力生產環保汽車，預計年產能達20萬輛，並於8月開始建設。雖然中期盈利倒退11%，但有新業務憧憬，市場自然受落。經歷股災洗禮，五菱汽車曾低見0.42元，近日以大圓底重上供股價，兼創近4個月高，貨源已落強者手中，是撻著引擎的時候了！
唐牛
https://www.facebook.com/tongcow88
唐牛
魚樂無窮 - 唐牛 舊文