異動空間：
休股期做三件事
仲有8個交易日就收爐等出年。股票收爐有好多嘢可做，今日講住三樣先，其他周三再續。
一、睇番過去11個月的股票月結單。魏力習慣每季review一次，望番炒過的股票，想想當時點解會買賣，之後走勢係點，最重要係檢討做錯的交易，係衰多手？注碼控制得差？錯估盈利？
定中咗技術陷阱？炒股係長期作戰，不斷改良炒作技巧，由自己月結單開始。
二、上網找資料分析明年經濟。分析經濟看似複雜，但其實大方向不難掌握。美國加息收水，美元港元強；中歐日放水救經濟，人幣歐元日圓弱；本港經濟跟大陸，滙率跟美國，後果可想而知，明年炒股要好審慎、要捱，今年的大時代光景未必再有。自行研究經濟，建立個人觀點，再進行投資。
三、讀一本股票書籍。吳局長月讀30本書，魏力自愧不如，但十日八日睇本200多頁的股票書仍可應付。技術分析、行業趨勢等，睇完明年實踐應用，有好書歡迎到fb分享！近期推介的中升（881）走勢不錯，可繼續留意。
魏力
http://www.facebook.com/2012jason
本欄逢周一、三、五刊出
魏力
異動空間 - 魏力 舊文
來源 source: http://hk.apple.nextmedia.com