中環在線：求婚鑽戒要幾大？
趙海珠：1卡好合理
「鑽石代表永恒」真係由細聽到大，大概唔少女士都希望求婚時，排場有咁童話得咁童話，粒鑽石有咁閃得咁閃。不過，幻想同現實好多時係會有差距嘅！香港鑽石總會近日就做咗項調查，訪問了600位港女及400位港男，發現6成受訪港女，希望男朋友求婚時
會收到1卡以上嘅鑽石；相反只有4成受訪港男，打算買1卡以上鑽戒求婚喎。睇怕唔少港女要失望喇！
鑽石總會主席馬墉宜就話，其實3萬蚊都夠買1卡鑽石㗎喇，不過就「一定買唔到Tiffany」囉。目前Tiffany1卡單粒鑽戒，索價約13萬，碎鑽款都至少要5、6萬。究竟平日教人要精打細算的財金界靚女，係咪同意上述調查結果呢？
已經被私有化、淡出財金界的幸福人妻趙海珠（珠珠）就話：「1卡鑽好合理，要有誠意，如果男士搵得多，無理由要慳老婆本喎！」不過珠珠都好體貼，話如果經濟條件唔許可就唔好「充大頭」，仲話鑽石size唔係唯一衡量對方愛嘅標準㖭！珠珠當年收幾多卡婚戒？佢冇講，但強調「好滿意」。
林燕玲：越大粒越好
前輪後林燕玲亦同意，如有能力，求婚鑽石「當然越大粒越好」，不過轉頭佢就質疑鑽石被塑造為「永恒」象徵，只係商家的宣傳策略：「我唔覺得要用錢去證明永恒嘅意義。如果去到沙漠，我就寧願要水都唔要鑽石喇！」
至於新鴻基私銀助理副總裁蔡雪瑩就話，如果自己畀錢買會有好多要求，但如果係求婚戒指就「無所謂」：「最緊要男朋友真心，安排得有心思！」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文