中環在線 - 李華華 2015年12月30日
中環在線：財經界爆離奇失竊案
數簿又不見了！
■中國動保負責運送財務文件嘅司機，喺食晏期間，被人偷曬啲文件。
去到年尾，忽然有唔少怪事，好似有江湖人物話要爆料，點知臨尾冇影，財經界亦有一宗離奇盜竊案。
停緊牌嘅中國動物保健品（940）就話，有人有車唔偷，偏偏偷走車上嘅財務文件正本喎。
中國動保 送京途中遇竊
中國動保今年3月開始停牌，公司日前出通告話，本月3號，公司一架卡車裝住過去4個財政年度同埋本年度嘅財務文件正本，由石家莊開往北京送去法證調查途中，竟然發生故障。
壞車當然要整喇，翌日整好，司機就攞番架車，走去食晏，就喺呢個時候，架車被偷走了。去到12號，公安搵番部車，但文件就唔見曬。呢個世界竟然有人覺得文件值錢過架車，認真有趣。呢間公司因延遲刊發全年業績而停牌，家陣未做到法證工作，睇嚟有排未可以復牌。
山水水泥 遺失賬簿報警
無獨有偶，正在停牌嘅山水水泥（691）噚日又話，公司月初罷免一班董事後，新管理層走去金鐘力寶寫字樓搜查，搵唔到若幹賬簿，已就可能盜竊賬簿，前日向香港警察報案。
大慶乳業 水浸浸毀文件
講到離奇唔見賬簿，以前都有經典個案。好似又係停緊牌嘅大慶乳業（1007），公司2013年話，位於黑龍江寫字樓嘅暖氣管因北方天氣極寒（攝氏零下32℃以下）、管道老化，爆咗，兩層樓水浸，財務、物流、行政、工程部嘅電腦同文件被廣泛破壞。前首席財務官方秉權因為咁，認為自己冇能力對公司進一步貢獻就辭職㖭。據聞，呢間公司𠵱家仲未有聲氣話復牌。
福和集團 寫字樓被爆格
廢紙回收商福和（923，現稱綜合環保集團IWS）一樣俾人爆過格。話說公司2011年唔見咗1億人仔，調查發現係前主席梁契權細妹擅自貸出，翌年3月，公司就話粉嶺寫字樓俾人闖入，上鎖房間與櫃桶被撬開同摷過，同年商業罪案調查科介入調查。
福和爛攤子最後由新世界發展（017）創辦人鄭裕彤接手，叮走梁契權，由彤叔孫仔、新世界第三代鄭志明出任主席至今。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com