魚樂無窮：如何煉成倍升股
■國際精密獲中國寶安提出全購，說穿了又係一單借殼上市。 資料圖片
國際精密（929）宣佈，獲中國寶安提出全購，每股1.5元，今日復牌一如預期大升，最後收報1.51元，升37%。如何計算投資價值，好簡單，只要交易不出亂子，1.5元全購價，可視為包底價，所以越
接近呢個水位買貨，安全度越高。
防守力夠曬，攻擊力又如何？不妨從數字尋找答案。先睇新買家中國寶安，翻查資料，中國寶安於1983年成立，擁有超過30年歷史，主打三瓣業務︰高新技術、房地產及生物製藥，新舊經濟概念齊曬！通告講明，要約結束後國際精密會維持上市地位，中國寶安亦有權將業務及營運作出變動，以提高價值。真相大白了，原來又係一單借殼上市，中國寶安在深交所上市，最新市值超過300億港紙，係國際精密嘅21倍，注資概念有幾大？畫公仔唔使畫出腸喇啩。
國際精密主要從事硬盤驅動器、液壓設備及汽車零件的精密金屬零件，以及其他用途零件，連續多年賺錢，表現不過不失，但從資產角度出發，便聞到陣陣香味──手頭淨現金超過2億，每股NAV達1.59元，市賬率不足1倍。你望下同樣獲深圳上市公司中弘全購嘅卓高（264）同開易（2011），市賬率炒到超過3倍，國際精密就算炒高一倍，相對上述兩股，依然係平到笑。如果消化到1.5至1.7元嘅陳年蟹貨，劇情將會十分精采！
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com