內房融資術
2015年12月30日
內地B股周初插水後反彈，帶動A股同港股回穩，但前日B股急插時，港股跌幅相對溫和，所以昨日的反彈幅度有限，恒指回升咗80點，收報21999點，國企指數差不多原地踏步，成交只有379億元，頗有進入冬眠期的感覺。
恒大抽水股價又升
股市雖然波動唔大，但企業消息就不斷。近日消息
多多嘅恒大地產(3333) 發永久證券，同時宣佈收購內地多個項目，恒大午後復牌，全日升近5%，報6.6元，有份出售項目的新世界中國(917) 跌1%，報5.9元；新世界(017) 降0.26%，報7.61元。睇番今次恒大發行永久證券，實際上係近期另一波融資，佢由年中發股集資、跟住喺內地發債，到依家發永久證券，以不同形式籌資超過700億元資金。今次佢發永久證券，雖然要俾高過股票的利息，但就籌到一筆毋須贖回的資金，這筆資金用來買番部份認購佢證券者的資產，恒大出售後就可以套現兼賺錢，計落除笨有精，所以消息公佈後恒大股份反應偏好。
有同內地富豪相熟的猛人話，香港人上岸心態濃烈，做生意傾向保守，落注前要計清計楚回報。內地人就唔同，佢哋習慣內地高速增長的模式，以擴大市場佔有率為先，尤其呢兩年內地股市、債市發展得快，佢哋策略變咗資本市場先行，最重要係諗掂點樣喺市場融資，只要能夠透過股市、債市搵到資金，就算資產價錢貴少少，佢哋都照買無手軟，諗住快買快賣。好似恒大本身賣樓銷售能力強，佢願意用好價向港商買入內地項目，再透過本身網絡快速去貨，自然爭取到有利的交易條件，特別係付款辦法，好似佢出價收購物業，然後發番股債俾對方融資，一來一回就加大自己盤生意。
出售項目俾恒大的港商，自己在內地無恒大咁樣的快速銷售能力，項目責死在自己帳上，依家沽咗佢，雖然未必全部真金白銀落袋，但勝在可以賣到嘢，體現到項目的利潤，跟住買番恒大的債券或證券仲有唔錯利息收，好過個項目擺係自己處唔郁，都算係雙贏方案，所以恒大呢招近日可以頻頻得手就係咁解，恒大等如有人融埋資、俾埋半熟的項目自己去銷售，好快就套到利，兼且擴大市場佔有率。
講開內房大動作，萬科(2202) 爭奪戰傳出峰迴路轉，《新浪財經》報道，兩大外部股東寶能系及安邦，與萬科管理層三方，上周召開和談會，會議由安邦保險集團董事長兼CEO吳小暉主持，三方基本已達成和局。安邦有可能接手寶能系股份，將代對方成為萬科大股東。中環茶友話，行家一出手、便知有沒有，安邦近年急速冒起，背後水喉強大，寶能今次出手偷雞，最後好有可能係為安邦作嫁衣，呢個結果其實唔應該太令人意外。
新一波消息中，另一單比較震撼性係中國電信(728) 董事長常小兵被查。事件令業內人心惶惶，由於他在聯通多年，外界揣測今次調查可能會波及聯通部份中高層，甚至傳到有人失聯。聯通亦發出公告表示堅決擁護中央決定，貫徹從嚴治黨要求。
電訊股人事震盪股價穩
常小兵呢次下馬，主要是被人實名舉報涉及權錢交易、選人用人問題等，調查內容可能在其出任中國聯通董事長期間，處置出資不當，導致國有資產流失有關。相關舉報信部份內容指出，2011年8月2日，中國聯通將一房產以4億元低價直接過戶給國澳實業有限公公司。這處房產位於北京西長安街南部，當時市值高達12億元人民幣，結果惹到一身蟻。
今次常小兵被查，內地有個睇法係佢同已落馬的軍委副主席郭伯雄關係密切，郭伯雄出事後，佢已經證明係站錯邊，加上內地電訊業重組在即，中央對相關人士特別重視，令佢更加無運行。中央依家要重整電訊企業，呢個大方向唔會因為人事改變，高層只能支持、不能反對，態度十分明確，所以雖然有高層被查消息，但幾隻內地電訊股份都炒重組而造好，焦點的中電信收報3.69元、中聯通收報9.54元，同升0.3%、中移動收87.75元，升0.17%。
陸羽仁
金融High Tea 舊文
來源 source: http://hdfin.stheadline.com