中環在線：自傳寫發跡史 寄語財富袋唔走
呂志和：錢係煩惱嚟㗎
■呂志和對財富睇得好淡，形容自己嘅生活好簡單。 李潤芳攝
嘉華（173）與銀娛（027）主席呂志和經常話，對財富睇得好淡，形容「只係數字遊戲」，就算係賬面身家縮水，喺富豪榜排名下跌，佢都話唔會點理。佢噚日出席自傳《呂志和
傳》嘅記者會，直情有感而發咁話：「錢係煩惱嚟㗎！」相信好多人都想幫佢分擔呢個煩惱。
■自傳刊出呂志和（左三）與妻兒於1969年合照。 根據《福布斯》香港富豪榜最新統計，呂志和身家624億元，縮水四成，排名由前年第5位，跌落第7位。呂志和對於排名倒退，淡淡然咁話「（錢）袋唔走、帶唔到」，睇得重咪盞搞到煩惱，跟住語重心長咁話「錢唔係咁高尚」。
呂志和認為，若然身上只得一千幾百，要搵嘢做、搵飯食嘅人，踏踏實實咁過生話，先算係安樂，又話自己嘅生活都好簡單。
呂志和由13歲開始做「小老闆」，同唔少大孖沙一樣，見證住香港經濟起落。佢咁多年做過唔少生意，賣過花生、「馬仔」薩琪瑪同汽車零件，又搞過重型機械貿易，直到做石礦場嗰陣，正式成名，兼被封做「石礦大王」。喺70年代涉足酒店業後，亦為日後去澳門開賭同度假村打穩基礎，千禧年後正式進軍濠賭業。
講到成功之道，呂志和笑言，冇乜秘訣可言，但有三種元素缺一不可，就係「勤奮、不恥下問、有誠信」，事前要做足功課，亦要諗嚇點樣識到一啲人，肯去幫自己手，「天時、地利、人和」就係佢今日成功嘅條件嘞。
今年87歲嘅呂志和多次表明無意退休，就算退，都會返公司做顧問，唔想退休後，每日都係睇住日出日落，好似等死咁，其實呢番話佢講過好多次㗎喇，應該係好真心。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com